ప్రధాని మోదీ అధ్యక్షతన కేంద్ర మంత్రిమండలి సమావేశం

ప్రధానమంత్రి నరేంద్ర మోదీ అధ్యక్షతన కేంద్ర మంత్రిమండలి సమావేశం జరిగింది. ఈ సమావేశానికి క్యాబినెట్ మంత్రులు, స్వతంత్ర హోదా మంత్రులు, సహాయ మంత్రులు హాజరయ్యారు. సాధారణ క్యాబినెట్ సమావేశాలకు స్వతంత్ర హోదా, సహాయ మంత్రులు హాజరుకారు. అందువల్ల ఈ సమావేశానికి ప్రత్యేక ప్రాధాన్యత వచ్చింది.

జూన్ 9కి మోదీ నేతృత్వంలోని ప్రభుత్వం రెండేళ్లు పూర్తి చేసుకోనుంది. అలాగే మోదీ ప్రధానమంత్రిగా 12 ఏళ్లు పూర్తి కానున్నాయి. ఈ నేపథ్యంలో శాఖల వారీగా మంత్రుల పనితీరును ప్రధాని సమీక్షించారు. కొంతమంది మంత్రులు తమ శాఖల నివేదికలు వెంట తీసుకెళ్లినట్టు తెలుస్తోంది.

మంత్రిమండలి పునర్వ్యవస్థీకరణకు సంబంధించిన అంచనాల నేపథ్యంలో జూన్ మొదటి లేదా రెండో వారంలో క్యాబినెట్ విస్తరణ ఉండొచ్చని సమాచారం. BJP జాతీయ అధ్యక్షుడిగా నితిన్ నవీన్ బాధ్యతలు స్వీకరించిన నేపథ్యంలో పార్టీ కమిటీలకు కొంతమంది మంత్రులను మార్చే అవకాశాలున్నాయని తెలుస్తోంది. పంజాబ్ నుంచి AAP రాజ్యసభ సభ్యులు BJP లో చేరిన నేపథ్యంలో రాఘవ్ చడ్ఢాతో పాటు మరికొందరికి కేంద్రంలో అవకాశం ఇచ్చే చర్చ జరుగుతోందని తెలుస్తోంది. అయితే ఈ అంశాలు ఇంకా అంచనాల స్థాయిలోనే ఉన్నాయి.

మధ్యప్రాచ్యంలో పరిస్థితుల నేపథ్యంలో పెట్రోల్, డీజిల్, CNG, LPG దిగుమతులపై ఆధారపడటం తగ్గించాలని, సౌరశక్తి వంటి దేశీయ వనరులను వినియోగించాలని ఈ సమావేశంలో చర్చ జరిగినట్టు తెలుస్తోంది. Delimitation బిల్లు, మహిళా రిజర్వేషన్ బిల్లు విషయంలో జూన్ లో ప్రత్యేక సమావేశాలు నిర్వహించే అవకాశాలున్నాయని పేర్కొన్నారు.