మోదీ కేబినెట్ పునర్వ్యవస్థీకరణ: కిషన్ రెడ్డి, బండి సంజయ్‌కు ఉద్వాసన?

కేంద్ర క్యాబినెట్‌లో భారీ మార్పులు జరగనున్నాయని సంకేతాలు వస్తున్నాయి. ఈ నెల చివరిలో లేదా వచ్చే నెల మొదటి వారంలో cabinet reshuffle జరుగుతుందని ఢిల్లీలో సమాచారం వినిపిస్తోంది.

తెలంగాణ నుంచి ప్రస్తుతం కేంద్ర మంత్రులుగా ఉన్న కిషన్ రెడ్డి, బండి సంజయ్‌లకు ఉద్వాసన పలికే అవకాశం ఉందని పార్టీలో చర్చ నడుస్తోంది. అయితే ఈ విషయంపై BJP అధిష్టానం అధికారిక ప్రకటన ఇంకా చేయలేదు.

వారి స్థానంలో ధర్మపురి అరవింద్, DK అరుణ పేర్లు వినిపిస్తున్నాయి. మహిళా రిజర్వేషన్ అంశాన్ని దృష్టిలో ఉంచుకుని DK అరుణను కేబినెట్‌లోకి తీసుకోవాలన్న ఆలోచన ఉన్నట్లు తెలుస్తోంది.

NDA భాగస్వామ్య పక్షాలకు కేబినెట్‌లో అవకాశం ఇచ్చేందుకు కూడా ప్రణాళికలు ఉన్నాయని సమాచారం. JDU అధినేత నితీష్ కుమార్‌కు రాజ్యసభ సీటు ఇచ్చి కేబినెట్‌లోకి తీసుకోవాలని, AAP నుంచి BJP లో చేరిన రాఘవ్ చద్దాను కూడా కేబినెట్‌లో చేర్చాలని పరిశీలన జరుగుతోంది.

తమిళనాడు BJP మాజీ అధ్యక్షుడు అన్నామలైకి రాజ్యసభ సీటు ఇచ్చి కేంద్ర మంత్రివర్గంలోకి తీసుకోవాలన్న ఆలోచన కూడా ఉందని తెలుస్తోంది.

మహిళా రిజర్వేషన్ బిల్లు, నియోజకవర్గాల పునర్విభజన బిల్లు మళ్ళీ పార్లమెంట్ ముందుకు తీసుకురావాలని BJP ప్రణాళికలు వేస్తోంది. AAP MP లు BJP లో చేరడం, పశ్చిమ బెంగాల్‌లో BJP గెలుపు వల్ల పార్లమెంట్లో సంఖ్యాబలం పెరిగిన నేపథ్యంలో ఈ బిల్లులు ఆమోదం పొందే అవకాశాలు మెరుగుపడ్డాయని పార్టీ భావిస్తోంది.