చదువుకోని హాకర్ నుంచి రాజకీయ నాయకులకు చురకల ప్రశ్నలు; వైరల్‌గా మారిన మొహమ్మద్ ఇర్ఫాన్ వీడియో

చదువుకునే భాగ్యం లేకపోయినా, ప్రజాస్వామ్యం అంటే ఏమిటో లోతుగా అర్థం చేసుకున్న ఓ సామాన్య హాకర్ తన ప్రశ్నలతో దేశ దృష్టిని ఆకర్షించాడు. మొహమ్మద్ ఇర్ఫాన్ అనే ఈ వ్యక్తి న్యూస్ చర్చలో పాల్గొన్న రాజకీయ నాయకులను ప్రశ్నించిన తీరు సోషల్ మీడియాలో భారీగా వైరల్ అవుతోంది. ఇర్ఫాన్ ఏ స్కూలుకు వెళ్లలేదు. కానీ అతడి మాటల్లో రాజ్యాంగం పట్ల ఉన్న అవగాహన అందరినీ ఆశ్చర్యపరిచింది. 'ప్రజాస్వామ్యం అంటే ప్రజల ప్రభుత్వం. ప్రజల కోసం, దేశం కోసం పని చేయడానికి మిమ్మల్ని ఎన్నుకుంటారు. కానీ ఎన్నికల సమయంలో చూపిన కలలు ఐదేళ్ల తర్వాత ఎందుకు నెరవేరవు?' అంటూ అతడు స్టూడియోలో ఉన్న స్పోక్స్‌పర్సన్లను నిలదీశాడు. ఈ దేశంలో ఇన్ని పేపర్ లీకులు ఎందుకు జరుగుతాయని, దానికి సమాధానం చెప్పాలని అతడు డిమాండ్ చేశాడు. ఎన్‌సీఆర్‌బీ గణాంకాలను ఉటంకిస్తూ, 2024లో ఒక్క సంవత్సరంలోనే 1,70,746 మరణాలు సంభవించాయని, అంటే రోజుకు 467, ప్రతి నిమిషం ముగ్గురు చనిపోతున్నారని, వారిలో ఎక్కువ శాతం కూలీలేనని ఇర్ఫాన్ వెల్లడించాడు. 2019-21 మధ్య 13 లక్షల 13 వేల మంది మహిళలు దేశంలో కనిపించకుండా పోయారని, 'చొక్కా బటన్ పోయినా దొరుకుతుంది, మనుషులు మొత్తం కనపడకుండా పోతున్నారు' అని వ్యాఖ్యానించాడు. ప్రతి అంశంపై ప్రశ్నలు అడగడం తన హక్కు అని, నాయకులు సమాధానం చెప్పకుండా తప్పించుకోలేరని స్పష్టం చేశాడు. ఇర్ఫాన్ వీడియో క్లిప్‌లు వైరల్ కావడంతో, అతను మామూలు పౌరుడి గొంతుకగా గుర్తింపు పొందుతున్నాడు.