వర్షాకాలం మొదలైనా మాన్సూన్ ఎమర్జెన్సీ టీమ్స్ సిద్ధం కాలేదు

హైదరాబాద్ నగరంలో వర్షాకాలం ప్రారంభమైనప్పటికీ మాన్సూన్ ఎమర్జెన్సీ టీమ్స్ ఇంకా అందుబాటులోకి రాలేదు. జూన్ ఒకటవ తేదీ నాటికే సిద్ధంగా ఉండాల్సిన ఈ బృందాల కోసం ప్రస్తుతం టెండర్ల ప్రక్రియ కొనసాగుతుందని తెలుస్తోంది. జూలై 1 నాటికి నగరవ్యాప్తంగా 300 టీమ్స్ అందుబాటులోకి వస్తాయని అధికారులు చెబుతున్నారు. అయితే అప్పటివరకు నగర పరిస్థితి ఏమిటనే ప్రశ్నలు తలెత్తుతున్నాయి.

గతంలో ప్రతి ఏడాది GHMC ఆధ్వర్యంలో మాన్సూన్ ఎమర్జెన్సీ టీమ్స్ ఏర్పాటు చేసేవారు. టెండర్ల నిర్వహణలో అవకతవకలు మరియు అవినీతి ఆరోపణలు వెలుగులోకి రావడంతో గత సంవత్సరం నుంచి ఈ బాధ్యతలను ప్రభుత్వం HYDRA కు అప్పగించింది. గత సంవత్సరం మొదటిసారిగా HYDRA నగరవ్యాప్తంగా 150 మాన్సూన్ ఎమర్జెన్సీ టీమ్స్ ఏర్పాటు చేసింది. ఔటర్ రింగ్ రోడ్ పరిధిలో 300 వార్డులు ఉండటంతో ఈసారి 300 టీమ్స్ అవసరం అని నిర్ణయించారు.

చెట్లు కూలిపోవడం, విద్యుత్ స్తంభాలు పడిపోవడం, రోడ్లపై నీరు నిలవడం, ట్రాఫిక్ అంతరాయం వంటి సమస్యలకు వెంటనే స్పందించే బాధ్యత మాన్సూన్ ఎమర్జెన్సీ టీమ్స్ పై ఉంటుంది. నగరంలో ఇటీవల కురిసిన తొలి భారీ వర్షానికి పలు ప్రాంతాల్లో చెట్లు కూలిపోయి గంటల తరబడి అలాగే ఉండిపోయాయి. ప్రధాన రోడ్లపై నీరు నిలవడంతో వాహనదారులు తీవ్ర ఇబ్బందులు పడ్డారు.

మే నెల ప్రారంభం నుంచే HYDRA ఆధ్వర్యంలో వర్షాకాల సన్నద్ధతపై వరుస సమావేశాలు జరిగాయి. HYDRA కమిషనర్ రంగనాథ్ లోతట్టు ప్రాంతాలు, వాటర్ లాకింగ్ పాయింట్లు, నాలాల పరిస్థితి, చెరువుల భద్రత మరియు అత్యవసర స్పందన వ్యవస్థలపై సమీక్షించారు. అయితే ఆ సమావేశాలు సమావేశాలకే పరిమితమై క్షేత్ర స్థాయిలో అమలు కాలేదనే విమర్శలు వినిపిస్తున్నాయి.

మరోవైపు నగరంలో వరదనీటి సమస్యకు ప్రధాన కారణమైన నాలాల అభివృద్ధి పనులు కూడా పూర్తి కాలేదు. GHMC చేపట్టిన పలు స్ట్రాటజిక్ నాలాల నిర్మాణ పనులు ఇంకా కొనసాగుతున్నాయి. వర్షాకాలం మొదలయ్యే లోపు నాలాల పూడిక తీత పూర్తి చేయాల్సి ఉన్న అనేక ప్రాంతాల్లో పనులు ఇంకా జరుగుతూనే ఉన్నాయి. దీంతో వర్షపు నీరు రోడ్లపైనే నిలిచిపోతుందని నగరవాసులు ఆందోళన వ్యక్తం చేస్తున్నారు.