మరో 2-3 రోజుల్లో కేరళకు రుతుపవనాలు: IMD అంచనా, తెలంగాణలో జూన్ రెండో వారం

IMD తాజా అంచనా ప్రకారం, నైరుతి రుతుపవనాలు మరో 2-3 రోజుల్లో కేరళ రాష్ట్రాన్ని తాకుతాయి. గతంలో మే 26న రుతుపవనాలు కేరళకు చేరతాయని IMD ప్రాథమిక అంచనా వేసింది. మే 29న ఈ అంచనాను సవరించి, వచ్చే రెండు మూడు రోజుల్లో రుతుపవనాలు వస్తాయని ప్రకటించింది.

అరేబియా సముద్రంలోని నైరుతి ఆగ్నేయ ప్రాంతాలు, తమిళనాడులోని కొన్ని ప్రాంతాలతోపాటు, పశ్చిమ, తూర్పు, ఈశాన్య బంగాళాఖాతంలోని కొన్ని ప్రాంతాలకు రుతుపవనాలు విస్తరించే పరిస్థితులు కనిపిస్తున్నాయి.

పశ్చిమ పసిఫిక్ మహాసముద్రంలో ఎల్నినో పరిస్థితులు ఏర్పడ్డాయని, దీని ప్రభావంతో ఈ ఏడాది నైరుతి రుతుపవనాల సీజన్లో సాధారణం కంటే తక్కువ వర్షపాతం నమోదుకావచ్చని IMD తెలిపింది. ప్రస్తుతం ఎల్నినో బలహీనంగా ఉన్నప్పటికీ, సెప్టెంబర్ నాటికి ఇది మరింత బలపడే అవకాశం ఉంది.

రుతుపవనాల విస్తరణకు అనుకూల పరిస్థితులు నెలకొన్నాయి. నేడు, రేపు పలు ప్రాంతాల్లో వర్షాలు పడే అవకాశం ఉంది. గంటకు 40-50 కి.మీ వేగంతో ఈదురుగాలులు వీచే అవకాశం ఉండగా, రాబోయే నాలుగు రోజుల్లో ఉష్ణోగ్రతలు తగ్గనున్నాయి.

తెలంగాణ విషయానికొస్తే, జూన్ నెల రెండో వారంలో నైరుతి రుతుపవనాలు రాష్ట్రాన్ని చేరుకుంటాయని వాతావరణ శాఖ అంచనా వేస్తోంది. ఇప్పటివరకు రాష్ట్రంలో వేసవి తీవ్రత కొనసాగుతోంది.