ముచ్చింతల యతీంద్ర సప్తతి నాలుగో రోజు: 70 మందికి సమతా పురస్కారాలు

ముచ్చింతలలోని సమతామూర్తి ప్రాంగణంలో యతీంద్ర సప్తతి వేడుకలు నాలుగో రోజుకు చేరుకున్నాయి. ఉత్సవాల్లో భాగంగా వివిధ రంగాల్లో దేశ సేవ చేసిన 70 మందిని సమతా పురస్కారాలతో సత్కరించారు.

ఈ రోజు మధ్యాహ్నం మాతృ సవనం కార్యక్రమం నిర్వహించనున్నారు. సమాజ సేవలో నిమగ్నమైన 70 మంది మాతృమూర్తులను ఈ కార్యక్రమంలో సన్మానిస్తారు.

సత్కార కార్యక్రమంలో మై హోమ్ గ్రూప్ చైర్మన్ జూపల్లి రామేశ్వరరావు మాట్లాడారు. ప్రపంచంలోనే అతి పురాతనమైన సంస్కృతి, సంప్రదాయాలు భారతదేశానివని ఆయన అన్నారు. ఎంతోమంది దేశాన్ని ఆక్రమించినా మన సంస్కృతిని నాశనం చేయలేకపోయారని చెప్పారు. అందుకు కారణం మన స్వామీజీలు, గురువులేనని ఆయన పేర్కొన్నారు.

త్రిదండి చిన్న జీయర్ స్వామి మాట్లాడుతూ, అన్ని మతాలు, వర్గాలను గౌరవించే తత్వం భారతదేశానిదని చెప్పారు. దేశం ఎవరికీ తలవంచదని, ఆ విషయం ఆపరేషన్ సింధూర్ సమయంలో మరోసారి స్పష్టమైందని ఆయన అన్నారు. ఒకరినొకరు గౌరవించుకుంటూ, ఎవరిపైనా ఆధిపత్యం చూపకుండా దేశం ముందుకు సాగుతుందని ఆయన తెలిపారు.

ఈ సాయంత్రం శ్రీ కోదండ రామునికి ప్రత్యేక పూజలు నిర్వహిస్తారు. 33వ ఏకోత్తర సహస్ర కలశాభిషేకానికి అంకురార్పణ జరుగుతుంది.