విజయనగరం పైడితల్లి అమ్మవారి ఉత్సవాలు మహా చండీ హోమంతో ముగింపు

విజయనగరం పైడితల్లి అమ్మవారి ఉత్సవాలు మహా చండీ హోమంతో ముగిశాయి. ఆలయ ప్రాంగణంలో వేద పండితులు శాస్త్రోక్తంగా హోమం నిర్వహించి పూర్ణాహుతి చేశారు.

ఈ ఉత్సవాలు అక్టోబర్ 1న మండల దీక్షతో ప్రారంభమయ్యాయి. అక్టోబర్ 26, 27 తేదీల్లో సిరిమానోత్సవం, తెప్పోత్సవం, కలశజ్యోతి ఊరేగింపు, ఉయ్యాల కంబాల ఉత్సవాలు జరిగాయి. ఉత్తరాంధ్ర ఇలవేల్పుగా భావించే ఈ పండగను నెల రోజుల పాటు నిర్వహించినట్టు నిర్వాహకులు తెలిపారు.

హోమంలో ఎమ్మెల్యే అదితి గజపతిరాజు పాల్గొని ప్రత్యేక పూజలు చేశారు. ప్రజలందరిపై అమ్మవారి ఆశీసులు ఉండాలని ఆమె కోరుకున్నారు.

తుఫాను, భారీ వర్షాల నడుమ కూడా ఉత్సవాలు అంతరాయం లేకుండా జరిగాయని ఆమె తెలిపారు. భక్తులు గొడుగులు పట్టుకుని వచ్చి ఉత్సవాలు చూశారు. విజయనగరం ప్రజలను అమ్మవారు ఎల్లప్పుడూ చల్లగా చూడాలని ఆమె ఆకాంక్షించారు.