ములుగు జిల్లా కలెక్టర్ హెచ్చరిక – నదులు, వాగుల వద్దకు వెళ్లొద్దు

ములుగు జిల్లా కలెక్టర్ బోర్కడే హేమంత్ సహదేవరావు భారీ వర్షాల నేపథ్యంలో ప్రజలకు తక్షణ హెచ్చరిక జారీ చేశారు. గోదావరి నదిలో వరద ప్రవాహం పెరుగుతున్నందున, ప్రజలు ఈత కొట్టడానికి, చేపల వేటకు నదీ తీరాలు, వాగులు, చెరువుల వద్దకు వెళ్లొద్దని సూచించారు. రానున్న 2-3 రోజులు అత్యవసరమైతే తప్ప బయటకు వెళ్లొద్దని కోరారు.

గోదావరి నది నీటి మట్టం ప్రస్తుతం 15.83 మీటర్లకు చేరుకోవడంతో రెండవ హెచ్చరిక జారీ చేసినట్లు కలెక్టర్ తెలిపారు. అత్యవసర సమయాల్లో సహాయం కోసం 18004257109 టోల్ ఫ్రీ నెంబర్‌ను 24/7 అందుబాటులో ఉంచామని, ఏ సమస్య ఉన్నా కాల్ చేసి ఫిర్యాదు చేయవచ్చునని వివరించారు.

అదనంగా, ఏటూరు నాగారం మండలం రామనగర్ నుంచి కమలాపురం వెళ్లే రోడ్డులోని పెద్దమ్మ తల్లి దేవాలయం దగ్గర గోదావరి నది ఉధృతంగా ప్రవహిస్తోంది. ప్రమాదాన్ని దృష్టిలో పెట్టుకుని కమలాపురం నుంచి రామనగర్ వచ్చే వాహనాలను జీడి వాగు మీదుగా మల్లించినట్లు అధికారులు తెలిపారు. జిల్లా యంత్రాంగం గ్రామ స్థాయి నుంచి జిల్లా స్థాయి వరకు అధికారులు అప్రమత్తంగా ఉన్నారని, ప్రజలు సమస్యలు ఎదురైతే టోల్ ఫ్రీ నంబర్‌కు కాల్ చేయాలని కలెక్టర్ విజ్ఞప్తి చేశారు.