మూసీ నది పునరుజ్జీవనం: తొలిదశకు రూ.7,345 కోట్లు, ADB రుణం; ప్రాజెక్టు వివరాలు

తెలంగాణ ప్రభుత్వం మూసీ నది పునరుజ్జీవన ప్రాజెక్టును ముందుకు తీసుకెళ్తోంది. ప్రతిపక్షాల నుంచి విమర్శలు ఉన్నా, తొలిదశ పనులు త్వరలో ప్రారంభం కానున్నట్లు అధికారులు తెలిపారు.

మొదటి దశలో 55 కి.మీ. నదీ తీరంలో 21 కి.మీ. మేర పనులు జరగనున్నాయి. ఇందుకు రెండు ప్రధాన రూట్లను గుర్తించారు. మొదటి రూట్ హిమాయత్ సాగర్ నుంచి బాపు ఘాట్ వరకు 9.2 కి.మీ. ఉండగా, రెండో రూట్ ఉస్మాన్ సాగర్ నుంచి బాపు ఘాట్ వరకు 12 కి.మీ. పొడవు ఉంది. రెండూ బాపు ఘాట్ వద్ద కలుస్తాయి.

భవిష్యత్తులో అతి భారీ వర్షాలు లేదా క్లౌడ్ బరస్ట్లు సంభవిస్తే నగరం మునిగిపోకుండా డిజైన్ చేయాలని రూర్కీలోని నేషనల్ ఇన్స్టిట్యూట్ ఆఫ్ హైడ్రాలజీ సిఫారసు చేసింది. గత వందేండ్ల వరద రికార్డులను విశ్లేషించి, గరిష్టంగా 1.5 లక్షల క్యూసెక్కుల వరద ప్రవాహాన్ని తట్టుకునేలా నిర్మాణాలు ప్లాన్ చేశారు.

తొలిదశ అంచనా వ్యయం రూ.7,345 కోట్లు. ఇందులో రూ.4,500 కోట్లు ఆసియా అభివృద్ధి బ్యాంకు (ADB) నుంచి రుణంగా లభిస్తుందని, మిగతా రూ.2,845 కోట్లు రాష్ట్ర ప్రభుత్వం సమకూరుస్తుందని అధికారులు తెలిపారు. భూసేకరణ ఖర్చు అదనంగా భరించాల్సి ఉంటుంది.

ఈ ప్రాజెక్ట్ ద్వారా నదిలోకి మురుగు నీరు చేరకుండా నిరోధించడం, ఆక్రమణలను తొలగించడం, పర్యావరణ హితంగా నదీ తీరాలను అభివృద్ధి చేయడంతో పాటు జలవిహారం, పర్యాటకాన్ని పెంపొందించడం లక్ష్యంగా ప్రభుత్వం పేర్కొంది. ఇంజనీరింగ్, ప్రొక్యూర్మెంట్, నిర్మాణం (EPC) పద్ధతిలో టెండర్లు పిలుస్తారు.