మైసూర్ ప్యాలెస్ యాజమాన్యంపై వివాదం: రాజమాత ప్రమోదాదేవి హెచ్చరిక

మైసూర్ ప్యాలెస్ యాజమాన్యంపై కర్ణాటకలో వివాదం రాజుకుంది. ప్యాలెస్ ప్రభుత్వానిదా, రాజ కుటుంబానిదా అనే ప్రశ్న అక్కడ చర్చకు దారితీసింది.

ఈ వివాదానికి తాజా కారణం ఇటీవల ముగిసిన మైసూర్ దసరా ఉత్సవాలు. ప్యాలెస్ ఆవరణలో ప్రభుత్వ అధికారులు, పోలీసుల ప్రవర్తనపై రాజమాత ప్రమోదాదేవి ప్రకటన విడుదల చేశారు. రాజ కుటుంబం నిర్వహించే ప్రైవేటు పూజలకు, ఆయుధ పూజకు అంతరాయం కలిగిందని ఆమె ఆరోపించారు. పరిమిత ప్రాంతాల్లోకి అనధికార వ్యక్తులు చొరబడి సెల్ఫీలు దిగారని తెలిపారు. చెల్లుబాటు అయ్యే పాసులు ఉన్న రాజ కుటుంబ ప్రతినిధులను పోలీసులు అగౌరవపరిచారని ఆమె విమర్శించారు.

750 కిలోల బంగారు అంబారీ, రత్నాలు పొదిగిన చారిత్రక సింహాసనం యదువంశానికి చెందిన ప్రైవేటు ఆస్తులని రాజమాత స్పష్టం చేశారు. అవి ప్రభుత్వ సొత్తు కావని ఆమె అన్నారు. దసరా ఉత్సవాల కోసం మాత్రమే ప్రభుత్వం ఈ అంబారీని వాడుతుందని చెప్పారు. దానికి ప్రభుత్వం ఇచ్చేది గౌరవ వేతనం మాత్రమే తప్ప అది అద్దె కాదని తెలిపారు.

దీనిపై కర్ణాటక ప్రభుత్వం డిఫెన్స్ లోకి వచ్చింది. మైసూర్ జిల్లా ఇంచార్జ్ మంత్రి యతీంద్ర సిద్ధరామయ్య మాట్లాడుతూ, ప్యాలెస్‌ను రాజులే నిర్మించినా అది ప్రజల పన్నుల డబ్బుతోనే నిర్మించబడిందని అన్నారు. అందుకే అది ప్రజా ఆస్తి అని ఆయన అభివర్ణించారు.

ఈ వివాదం మరింత పెరగకుండా డికె శివకుమార్ రంగంలోకి దిగారు. రాజ కుటుంబం పట్ల ప్రభుత్వానికి పూర్తి గౌరవం ఉందని ఆయన చెప్పారు. అధికారుల సమన్వయ లోపాలపై వచ్చిన ఫిర్యాదులను పరిశీలిస్తామని తెలిపారు. రాజమాతతో స్వయంగా మాట్లాడి, చర్చల ద్వారా సమస్యను పరిష్కరిస్తానని హామీ ఇచ్చారు.

మైసూర్ ప్యాలెస్ యాక్ట్ కింద ఆస్తుల యాజమాన్య హక్కుల వివాదం ప్రస్తుతం సుప్రీం కోర్టు పరిధిలో ఉంది. డికె శివకుమార్ సానుకూల స్పందనకు రాజమాత ధన్యవాదాలు తెలిపారు.