సాయి కృష్ణ లాకప్ డెత్ కేసు: సిఐ నాగరాజు కోర్టుకు హాజరు, నలుగురు కానిస్టేబుల్‌లు కస్టడీలో

విజయవాడ కోర్టులో సాయి కృష్ణ లాకప్ డెత్ కేసు నిందితుడు సిఐ నాగరాజును హాజరుపరిచారు. ప్రభుత్వ ఆస్పత్రిలో వైద్య పరీక్షల అనంతరం ఆయనను కోర్టుకు తరలించారు. విచారణ తర్వాత ఆయనను రాజమండ్రి కేంద్ర కారాగారానికి తరలించనున్నారు.

ఈ కేసులో హెడ్ కానిస్టేబుల్ నానిని కూడా కోర్టులో హాజరుపరిచారు. కానిస్టేబుల్ అశోక్ నాని, బాబూరావు, సాంబయ్య, మరో కానిస్టేబుల్ సహా నలుగురిని SIT అధికారులు 5 రోజుల కస్టడీకి తీసుకున్నారు. ఈ రోజు నుంచి వారిని విచారించనున్నారు.

సిట్ అధికారులు ఇప్పటికే సిఐ నాగరాజును ఏడు రోజుల పాటు కెమెరా పర్యవేక్షణలో విచారించారు. అయితే, ఆయన ఆ విచారణలో సహకరించలేదని, చాలా ప్రశ్నలకు మౌనంగా ఉన్నారని సంబంధిత వర్గాల సమాచారం. కస్టోడియల్ టార్చర్, డెడ్ బాడీ మాయం వంటి కీలక అంశాలపై సరైన సమాధానాలు రాలేదు.

నిందితుడు సురేష్ (A4) పరారీలో ఉన్నాడు. నాగరాజుకు ఆయనతో ఉన్న స్నేహం, మృతదేహం తరలింపులో అతని పాత్రపై సిట్ ప్రశ్నించింది. సురేష్ ఆచూకీ కోసం పోలీసులు గాలిస్తున్నారు.

మొత్తం సిట్ విచారణ ప్రక్రియను కెమెరాలో రికార్డు చేసి సుప్రీంకోర్టుకు అందజేయనున్నారు. కేసు దర్యాప్తు కొనసాగుతోంది.