సాయి కృష్ణ కస్టోడియల్ డెత్ కేసు: సీఐ నాగరాజుకు 8 రోజుల సిట్ కస్టడీ, కోర్టు విధించిన షరతులు

సాయి కృష్ణ కస్టోడియల్ డెత్ కేసులో కీలక పరిణామం చోటు చేసుకుంది. ఈ కేసులో ప్రధాన నిందితుడు, కృష్ణలంక పోలీస్ స్టేషన్ మాజీ సీఐ నాగరాజును సిట్ అధికారులు ఎనిమిది రోజుల కస్టడీకి తీసుకున్నారు. ఏపీ హైకోర్టు ఈ విచారణకు అనుమతి ఇచ్చింది.

విజయవాడ కోర్టు ముందు విధించిన షరతులను హైకోర్టు పాక్షికంగా సవరించింది. సాక్ష్యాల సేకరణ, సీన్ రీకన్స్ట్రక్షన్ కోసం నాగరాజును కృష్ణలంక స్టేషన్‌తో పాటు నేర ఘటనలు జరిగిన ఇతర ప్రదేశాలకు తీసుకెళ్లేందుకు అనుమతి లభించింది. అయితే నాగరాజు ప్రతి కదలిక, విచారణ మొత్తాన్ని వీడియో రికార్డ్ చేయాలని, ఒరిజినల్ రికార్డింగ్‌లను ఈ నెల 17వ తేదీన విజయవాడ మెజిస్ట్రేట్ కోర్టుకు సమర్పించాలని హైకోర్టు స్పష్టం చేసింది.

సాయి కృష్ణ హత్య కేసులో సీఐ నాగరాజు నోరు విప్పడం కీలకంగా మారింది. ఇప్పటివరకు ఆయన ఏ సమాచారమూ వెల్లడించలేదు. స్టేషన్ సిబ్బందిని ప్రశ్నిస్తున్నా సాయి కృష్ణ ఎప్పుడు చనిపోయాడనే దానిపై స్పష్టత రాలేదు. మే 6 నుంచి 8 మధ్య మూడు షిఫ్టుల్లో డ్యూటీ చేసిన వారిని సిట్ విచారిస్తోంది. నాగరాజు సహకరించకపోతే దర్యాప్తు ముందుకు సాగడం కష్టమని సిట్ వర్గాలు భావిస్తున్నట్లు తెలుస్తోంది.