పుణెలో భవనం కూలి 9 మంది సజీవంగా బయటకు; మరికొందరు శిథిలాల్లో చిక్కుకున్నారు

మహారాష్ట్రలోని పుణె జిల్లా పింప్రీ-చించ్వాడ్ ప్రాంతంలో ఓ మూడంతస్తుల భవనం కూలిన ఘటనలో ఎన్డీఆర్ఎఫ్, ఆర్మీ సిబ్బంది రాత్రంతా శ్రమించి 9 మందిని సజీవంగా రక్షించారు. ఇంకా కొందరు శిథిలాల కింద చిక్కుకున్నట్టు సమాచారం. సెర్చ్ అండ్ రెస్క్యూ ఆపరేషన్లు కొనసాగుతున్నాయి.

విపరీత వర్షాల కారణంగా సమీపంలోని చెత్త కుప్ప జారి ఈ భవనంపై పడటంతో ఇది కుప్పకూలింది. భవనం వేస్ట్-టు-ఎనర్జీ ప్లాంట్ పక్కన ఉంది. శిథిలాల కింద 6-7 మంది ఇంకా చిక్కుకుని ఉండవచ్చని స్థానికులు చెబుతున్నారు. ఎన్డీఆర్ఎఫ్ కమాండెంట్ ఎస్.బి. సింగ్ నేతృత్వంలో సహాయక కమాండెంట్ ప్రవీణ్ ధాత పర్యవేక్షణలో సిబ్బంది రెస్క్యూ చర్యలు కొనసాగించారు. లైఫ్ డిటెక్టర్లు, స్నిఫర్ డాగ్లు, అకౌస్టిక్ సెన్సార్లు వంటి ప్రత్యేక పరికరాలు ఉపయోగించి చిక్కుకున్న వారి ఆచూకీ కనుగొనేందుకు ప్రయత్నిస్తున్నారు.

ఎన్డీఆర్ఎఫ్ అధికారులు తెలిపిన వివరాల ప్రకారం, జూలై 9 ఉదయం 6:30 గంటల వరకు తొమ్మిది మందిని సజీవంగా బయటకు తీశారు. మృతదేహాలు కూడా కనిపించాయి; ఒక మృతదేహాన్ని బయటకు తీయగా, మరో రెండు కనిపిస్తున్నాయి కానీ భారీ రాళ్ల మధ్య ఉన్నందున వాటిని తొలగించడానికి మరో 2.5 గంటలు పట్టొచ్చు. ఘటనాస్థలిలో జెసిబి యంత్రాలు, ఫైర్ బ్రిగేడ్ సిబ్బంది, మహానగరపాలిక అధికారులు సహాయక చర్యల్లో నిమగ్నమయ్యారు. రక్షించిన వారిని స్థానిక ఆస్పత్రులకు తరలించి చికిత్స అందిస్తున్నారు.

18 గంటలకు పైగా కార్యకలాపాలు కొనసాగుతున్నా చెత్త కుప్ప నుంచి మట్టి, రాళ్లు తొలగించడం సవాలుగా మారింది. మలబా భారీగా ఉండడంతో మెషిన్లతో పాటు మానవ శ్రమతో కూడా తొలగింపు పనులు చేస్తున్నారు. స్థానిక యంత్రాంగం ఎన్డీఆర్ఎఫ్‌తో సమన్వయం చేసుకుంటూ చిక్కుకున్న వారందరినీ వీలైనంత త్వరగా బయటకు తేవడానికి శ్రమిస్తోంది.