కువైట్‌లో నిజామాబాద్ యువకుడు అనుమానాస్పద మృతి; మృతదేహాన్ని ఎడారిలో పాతిపెట్టినట్లు కుటుంబం ఆరోపణ

నిజామాబాద్ జిల్లా డిచ్చిపల్లి మండలం కొరట్పల్లి తాండాకు చెందిన కైలాష్, ఉపాధి నిమిత్తం కొద్ది రోజుల క్రితం కువైట్ వెళ్లారు.

ఓ ఏజెంట్ ద్వారా వెళ్లిన కైలాష్, అక్కడ రోడ్డు నిర్మాణ పనుల్లో ఒక కాంట్రాక్టర్ వద్ద కూలీగా పని చేస్తున్నారు. అయితే, కైలాష్ అనుమానాస్పద స్థితిలో మృతి చెందినట్లు తెలుస్తోంది.

మృతదేహాన్ని యజమాని కుటుంబ సభ్యులకు సమాచారం ఇవ్వకుండా ఎడారి ఇసుకలో పాతి పెట్టారని ఆరోపణలు వస్తున్నాయి. కువైట్‌లో ఉన్న ఇతర తెలుగు వారి ద్వారా విషయం తెలుసుకున్న కుటుంబ సభ్యులు, బెస్తపల్లి పోలీస్‌స్టేషన్‌లో ఫిర్యాదు చేశారు.

కైలాష్ మృతిపై సమగ్ర దర్యాప్తు జరిపించాలని, మృతదేహాన్ని స్వగ్రామానికి తరలించాలని వారు ప్రభుత్వాన్ని కోరుతున్నారు. ఈ ఘటనతో కొరట్పల్లి తాండాలో విషాదం నెలకొంది.