2027 దీపావళి నాటికి నిఫ్టీ 35,000 కి చేరే అవకాశం: రాహుల్ అరోరా

2027 దీపావళి నాటికి నిఫ్టీ 35,000 స్థాయికి చేరుకోవచ్చని ఆశికా ఇన్‌స్టిట్యూషనల్ ఈక్విటీ సీఈఓ రాహుల్ అరోరా అంచనా వేశారు. అమెరికా మధ్యంతర ఎన్నికల తర్వాత ప్రపంచ రాజకీయ అనిశ్చితి తగ్గుతుందనే షరతుపై ఈ లెక్క చెప్పారు.

ప్రస్తుతం ఎక్విటీల్లో 60% వరకు మాత్రమే పెట్టుబడి పెట్టాలని, మిగిలిన 40% ఫిక్స్డ్ ఇన్‌కమ్, కమోడిటీ, రియల్‌ఎస్టేట్ వంటి ఇతర మార్గాల్లో ఉంచాలని ఆయన సూచించారు. క్రూడ్ ధరలు, రూపాయి విలువ తదితర అంశాలు ఇంకా అస్థిరంగా ఉన్నాయని, అందుకే కొంత జాగ్రత్త అవసరమన్నారు.

ఈక్విటీలో అత్యధిక భాగం బ్యాంకింగ్ రంగంలోనే ఉండాలని ఆయన స్పష్టం చేశారు. ప్రైవేట్ రంగ బ్యాంకుల వాల్యుయేషన్లు చారిత్రాత్మకంగా ఆకర్షణీయంగా ఉన్నాయని, ముఖ్యంగా హెచ్‌డీఎఫ్‌సీ బ్యాంక్ 1.6-1.7 పీబీ గుణకంలో లభిస్తోందని గుర్తించారు. నాన్‌ఫుడ్ క్రెడిట్ గ్రోత్ 16-17% ఉండడం, టాప్ బ్యాంకుల ఆర్‌ఓఏలు, రాబడులూ బలంగా ఉండడం బ్యాంకింగ్ షేర్లపై విశ్వాసం కలిగిస్తున్నాయన్నారు. ఐటీ రంగంలో 13-14 పీఈ రేషియోల వద్ద ట్రేడింగ్ అవకాశాలు ఉన్నాయని, అయితే అది ఇన్వెస్ట్‌మెంట్‌ కంటే తాత్కాలికమేనంటూ 10% వెయిటేజీ ఇచ్చారు. ఆటో రంగంపైనా ఆయన సానుకూలంగా ఉన్నారు. మంచి వర్షాలతో ట్రాక్టర్లకు డిమాండ్ వస్తుందని, మహీంద్రా అండ్ మహీంద్రా, మారుతీ సుజుకి, ఐషర్ మోటార్స్ వంటి స్టాక్స్‌లో లాభాల అవకాశం కనిపిస్తోందన్నారు. సిమెంట్, కన్జ్యూమర్ డిస్‌క్రెషనరీ రంగాల్లోనూ ఎంపిక చేసుకోవడం మంచిదని సలహా ఇచ్చారు.

వాల్యుయేషన్ల పరంగా మార్కెట్‌లో ఇప్పటికీ మంచి డీల్స్ ఉన్నాయని, అయితే నవంబర్ వరకు అమెరికా ఎన్నికల ఫలితాన్ని బట్టి గ్లోబల్ పరిస్థితి మారొచ్చని ఆయన హెచ్చరించారు.