వారాహి నవరాత్రి 2026: సాత్విక పూజా విధానం, నియమాలు – శివకామేశ్వరి అమ్మ సూచనలు

వారాహి నవరాత్రులు 2026 ఆషాఢ మాసంలో వస్తాయి. ఈ గుప్త నవరాత్రుల్లో వారాహి అమ్మవారిని పూజించడం ద్వారా ధైర్యం, రక్షణ, జ్ఞానం లభిస్తాయని ఆధ్యాత్మిక గురువు అమ్మ శివకామేశ్వరి వివరించారు. గృహస్తులు ఎలా జరుపుకోవాలన్న దానిపై ఆమె పలు సూచనలు చేశారు.

కలశం పెట్టి పూజ చేయదలచిన వారు నవధాన్యాలపై కలశాన్ని ఉంచి, మామిడాకులు, కొబ్బరికాయతో అలంకరించాలి. అష్టమాతృకలతో పాటు శ్వేతవారాహి అమ్మవారిని ఆవాహన చేయాలి. నివేదనగా పెరుగన్నం, దానిమ్మ పండు, ఉడికించిన చిలకడదుంప, క్యారెట్, బీట్రూట్, చామదుంప వంటివి పెట్టాలి. ప్రతిరోజు నిమ్మకాయను అమ్మవారి ముందు ఉంచాలి.

దీక్షలో ఉన్నవారు ఎరుపు రంగు నూలు వస్త్రాలు, చిన్న బార్డర్ ఉన్నవి ధరించాలి. పూజలో అష్టోత్తరం, కవచం, ద్వాదశ నామాలు పఠించడం విశేషం. గృహస్తులు "ఓం శ్రీ వారాహి దేవ్యే నమః" అనే నామాన్ని 108 సార్లు జపించుకోవచ్చు. బీజాక్షర మంత్రాలు, హోమాలు, తంత్రాలు గురువు దిశానిర్దేశం లేకుండా చేయకూడదని శివకామేశ్వరి హెచ్చరించారు.

పూర్తి 9 రోజులు చేయలేనివారు పంచమి, సప్తమి, అష్టమి, నవమి రోజుల్లో లేదా చివరి మూడు రోజులు మాత్రమే చేసుకోవచ్చు. మధ్య రజస్వల అయిన స్త్రీలు కలశాన్ని తాకకుండా ఇతరుల చేత దీపారాధన, నైవేద్యం చేయించాలి. సాత్వికమైన పూజ, నియమాలు పాటిస్తే సంకల్ప శక్తి, కుటుంబ రక్షణ లభిస్తాయని అమ్మ తెలిపారు.

గత రెండేళ్లలో వారాహి దేవి ఆరాధన విస్తృతంగా పెరిగింది. పలు దేవాలయాలు నిర్మితమై, ప్రత్యేక పూజలు చేస్తున్నారు. స్వప్నవారాహి, కిరాతవారాహి వంటి వివిధ రూపాలు ఉన్నప్పటికీ, గృహస్తులు శ్వేతవారాహి రూపాన్నే ఆరాధించాలని సూచించారు.