నెల్లూరులో వెలుగులోకి వచ్చిన నాగేశ్వర స్వామి ఆలయానికి పునర్నిర్మాణ శంకుస్థాపన

నెల్లూరు జిల్లా చేజర్ల మండలం పెరుమాళ్ళపాడులో కొన్ని వందల ఏళ్ల క్రితం ఇసుకలో కూరుకుపోయిన నాగేశ్వర స్వామి ఆలయాన్ని పునర్నిర్మించేందుకు ప్రభుత్వం చర్యలు చేపట్టింది. ఈ క్రమంలో దేవాదాయ శాఖ మంత్రి ఆలయానికి శంకుస్థాపన చేశారు. పునర్నిర్మాణానికి నిధులు మంజూరు చేశారు.

2020 సంవత్సరంలో కరోనా సమయంలో పెన్నా నదీ తీరంలో ఇసుక దిబ్బల్లో ఆలయ ఆనవాళ్లు కనిపించాయి. గ్రామ యువకులు ఇసుకను తొలగించడంతో పురాతన నాగేశ్వర స్వామి ఆలయం వెలుగులోకి వచ్చింది. అప్పట్లో ఈ వీడియో సోషల్ మీడియాలో వైరల్ కావడంతో దేశవ్యాప్తంగా ప్రచారం పొందింది. ఇటీవల కల్కి సినిమా సైతం ఇక్కడ చిత్రీకరణ జరుపుకుంది.

స్థానికులు చెప్పే కథల ప్రకారం పూర్వకాలంలో పరశురాముడు ఈ ఆలయాన్ని ప్రతిష్టించి పూజలు చేసేవాడు. ప్రకృతి వైపరీత్యాల కారణంగా గ్రామంతో పాటు ఈ ఆలయం ఇసుకలో కూరుకుపోయింది. ప్రస్తుతం పునర్నిర్మాణం జరుగుతోంది.