నాగార్జున తెలంగాణ సంస్కృతి నేపథ్యంలో కొత్త చిత్రం.. డిప్యూటీ సీఎం భట్టి విక్రమార్క ప్రశ్నతో వచ్చిన ఆలోచన

ప్రముఖ నటుడు నాగార్జున తెలంగాణ సంస్కృతిని ప్రతిబింబించే కొత్త చిత్రం చేస్తున్నట్లు ప్రకటించారు. ఈ చిత్రం ఆలోచన తెలంగాణ డిప్యూటీ సీఎం భట్టి విక్రమార్క అడిగిన ప్రశ్న నుంచి వచ్చిందని ఆయన తెలిపారు.

అన్నపూర్ణ కాలేజ్ ఆఫ్ ఫిల్మ్ అండ్ మీడియాను సందర్శించిన సందర్భంలో డిప్యూటీ సీఎం, 'మీరు తెలంగాణ కల్చర్ మీద సినిమా ఎందుకు తీయలేద'ని అడిగారని నాగార్జున చెప్పారు. ఆ ప్రశ్న తనకు కొత్త ఆలోచన రేపిందన్నారు.

"ఇంతకు ముందు ఉయ్యాలా చంపాలా, సోగ్గాడే చిన్నినాయన వంటి చిత్రాలతో ఏపీ కల్చర్, లెనిన్ సినిమాతో రాయలసీమ కల్చర్ చూపించాను. తెలంగాణ కల్చర్ మీద ఎందుకు తీయకూడదని వెంటనే ఆలోచన వచ్చింది" అని నాగార్జున వివరించారు.

అనంతరం దర్శకుడు ప్రసాద్‌తో మాట్లాడగా కథ సిద్ధంగా ఉన్నట్లు తెలిసిందని, ఆ విధంగా ఈ ప్రాజెక్ట్ ప్రారంభమైందని చెప్పారు. తన తల్లి పుట్టినరోజు ఆగస్టు 14 అని, ఈ చిత్రానికి తల్లిదండ్రుల ఆశీస్సులు ఉంటాయని తాను నమ్ముతున్నట్లు తెలిపారు.