నాగుల పంచమి వేడుకలు: సికింద్రాబాద్ మానసాదేవి ఆలయంలో భక్తుల రద్దీ

తెలంగాణలో నాగుల పంచమి వేడుకలు ఘనంగా జరిగాయి. సికింద్రాబాద్‌లోని మానసాదేవి ఆలయంలో ఉదయం నుంచే భక్తులు పెద్ద సంఖ్యలో వచ్చారు. మహిళలు నాగదేవతలకు పూజలు చేసేందుకు క్యూలో నిలిచారు.

శ్రావణ మాసంలో వచ్చే శుక్ల పంచమి రోజున ఏటా నాగుల పంచమి జరుపుకుంటారు. ఈ ఆలయానికి వందల ఏళ్ల చరిత్ర ఉందని భక్తులు చెప్పారు. నగరంలో నాగదేవత ఆలయాలు తక్కువగా ఉండడంతో భక్తులు ఎక్కువగా ఇక్కడికి వస్తున్నారు.

పూజల కోసం భక్తులు పాలు, పసుపు, కుంకుమ, నూనె, నాగబత్తీలు, కొబ్బరికాయలు, పండ్లు సమర్పించారు. కొందరు గత 20 ఏళ్లుగా ఈ ఆలయానికి వస్తున్నట్టు తెలిపారు. నాగదేవతకు అభిషేకాలు చేసి మొక్కులు చెల్లించుకున్నారు.

నాగదేవతను పూజిస్తే దోషాలు తొలగుతాయని, కోరిన కోరికలు నెరవేరుతాయని భక్తులు విశ్వసిస్తున్నారు. ఈ నమ్మకంతో చాలామంది కుటుంబాలతో కలిసి దర్శనానికి వచ్చారు. ఆలయ ప్రాంగణమంతా భక్తులతో కోలాహలంగా ఉంది.