40 ఏళ్లుగా రోడ్డు లేదని నందంపూడి గ్రామస్థుల నిరసన

డాక్టర్ బి.ఆర్. అంబేద్కర్ కోనసీమ జిల్లా అంబాజీపేట మండలం నందంపూడి గ్రామంలో రోడ్డు సమస్య తీవ్ర ఆందోళనకు దారితీసింది. గత నలభై ఏళ్లుగా సరైన రహదారి లేదని చెప్తూ గ్రామస్థులు రోడ్డుపై నిరసన చేపట్టారు.

వర్షాలు వచ్చిన ప్రతిసారీ రోడ్డు బురదమయంగా మారడంతో విద్యార్థులు, వృద్ధులు తీవ్ర ఇబ్బందులు ఎదుర్కొంటున్నారని వారు తెలిపారు. స్కూలుకు సైకిల్ పై వెళ్తున్న విద్యార్థులు జారిపడి గాయాలపాలవుతున్నారని, టీచర్లు తిడుతున్నారని కొందరు విద్యార్థులు చెప్పారు.

నందంపూడి నుంచి ఓకలగారు, తొండవరం గ్రామాలను కలిపే ఈ రోడ్డును 40 ఏళ్లలో వేయలేదని గ్రామస్థులు ఆవేదన వ్యక్తం చేశారు. ఈ విషయాన్ని జనసేన ఎమ్మెల్యే గిడ్డి సత్యనారాయణతో పాటు అధికారులను పలు మార్లు సంప్రదించినా స్పందన రాలేదని వారు పేర్కొన్నారు. గ్రామ ప్రెసిడెంట్ కూడా సాయం చేయలేదని ఆరోపించారు.

అదే నియోజకవర్గంలో ఇతర ప్రాంతాల్లో రోడ్లు వేస్తున్నా, ఇక్కడ మాత్రం నిర్లక్ష్యం జరిగిందని గ్రామస్థులు విమర్శించారు. ఈ విషయమై ఎమ్మెల్యే గిడ్డి సత్యనారాయణ స్పందన తెలియాల్సి ఉంది.