మంగళగిరి లక్ష్మీ నరసింహస్వామి ఆలయ జీర్ణోద్ధరణ పనులకు మంత్రి లోకేష్ ఆమోదం

ఆంధ్రప్రదేశ్ మంత్రి నారా లోకేష్ మంగళగిరి దిగువ సన్నిధిలోని శ్రీ లక్ష్మీ నరసింహస్వామి దేవాలయ జీర్ణోద్ధరణ, అభివృద్ధి పనులకు ఆమోదం తెలిపారు. ఉండవల్లి నివాసంలో అధికారులతో సమీక్ష నిర్వహించారు.

ఈ సందర్భంగా శ్రీకృష్ణదేవరాయ మండపం పునరుద్ధరణ, యాగశాల గంట మండపం పునర్నిర్మాణం, వాహనశాల నూతన నిర్మాణం వంటి ప్రతిపాదనలను పవర్ పాయింట్ ప్రెజెంటేషన్ ద్వారా వివరించగా, మంత్రి ఆమోదించారు. ఆలయ సాంప్రదాయాలకు అనుగుణంగా పనులు చేపట్టాలని ఆదేశించారు. ఆలయం వెలుపలి అభివృద్ధి పనులపైనా సూచనలు చేశారు.

మొత్తం ₹6 కోట్ల వ్యయంతో ఈ పనులు చేపట్టనున్నారు. వచ్చే నెలలో శంకుస్థాపన జరగనుంది. దాతల నుంచి విరాళాల సేకరణపై కూడా ఈ సమావేశంలో చర్చించారు.