రాప్తాడు బాధిత బాలికను పరామర్శించనున్న మంత్రి నారా లోకేష్

రాప్తాడులో జరిగిన దాడిలో తీవ్రంగా గాయపడిన బాలికను మంత్రి నారా లోకేష్ బెంగళూరులో పరామర్శించనున్నారు. మణిపాల్ ఆసుపత్రిలో ఆమెకు చికిత్స కొనసాగుతోంది. మానసిక అస్వస్థతతో ఉన్న వ్యక్తి జరిపిన దాడిలో బాలిక గాయపడింది.

చికిత్స కోసం బాలికను ప్రత్యేక గ్రీన్ కారిడార్ ద్వారా బెంగళూరుకు తరలించారు. తరలింపు తర్వాత కూడా మంత్రి లోకేష్ ఆమె ఆరోగ్య పరిస్థితిని నిరంతరం పర్యవేక్షిస్తున్నారు. ఆసుపత్రి నుంచి ప్రత్యేక బులెటిన్ తీసుకుంటున్నారు.

ఆసుపత్రిలో లోకేష్ వైద్యులను కలిసి బాలిక ఆరోగ్య పరిస్థితి, చికిత్స వివరాలు అడిగి తెలుసుకుంటారు. అనంతరం కుటుంబ సభ్యులను పరామర్శించి ధైర్యం చెబుతారు. ఈ సందర్భంగా మీడియాతో మాట్లాడే అవకాశం ఉంది.

ఘటనలో గాయపడిన ఇద్దరు బాలికల వైద్య ఖర్చులను రాష్ట్ర ప్రభుత్వమే భరిస్తుంది. గొంతు భాగంలో గాయం ఉన్న బాలికకు ప్రత్యేక చికిత్స అందిస్తున్నారు. బాలిక పూర్తిగా కోలుకునే అవకాశం ఉందని వైద్యులు చెబుతున్నారు.