అమరావతి రాజధానిలో మంత్రి నారాయణ పర్యటన; వాగులపై బ్రిడ్జి పనుల పురోగతి పరిశీలన

అమరావతి రాజధాని ప్రాంతంలోని కొండవీటి వాగు, పాలవాగు, గ్రావిటీ కెనాల్‌పై నిర్మిస్తున్న పనులను రాష్ట్ర మున్సిపల్, పట్టణాభివృద్ధి శాఖ మంత్రి నారాయణ పరిశీలించారు. ఈ సందర్భంగా వర్షాకాలంలో వాగుల్లో నీటి ప్రవాహానికి ఎలాంటి అంతరాయం కలగకుండా ముందస్తు జాగ్రత్తలు తీసుకోవాలని అధికారులను ఆదేశించారు.

రాజధాని నిర్మాణంలో భాగంగా సీఆర్టీఏ 43 ఎల్పీఎస్ లేఅవుట్ల పరిధిలో 26 వంతెనలను నిర్మిస్తోంది. మొత్తంగా కొండవీటి వాగు, పాలవాగుపై 69 వంతెనల నిర్మాణం జరుగుతోంది. ప్రతి కిలోమీటరుకు ఒక ట్రంక్ రోడ్డు నిర్మిస్తున్నారు. ఈ ట్రంక్ రోడ్లు 165 నుంచి 195 అడుగుల వెడల్పుతో 6 నుంచి 9 లైన్లతో ఉంటాయి.

అమరావతిలో మొత్తం 34 ట్రంక్ రోడ్లు (16 తూర్పు-పడమర, 18 ఉత్తర-దక్షిణ దిశల్లో) నిర్మించనున్నట్లు అధికారులు తెలిపారు. ఈ రోడ్లు వాగులను దాటే చోట్ల వంతెనల నిర్మాణం కొనసాగుతోంది. మంత్రి నారాయణ పర్యటనలో పనుల వేగం, వర్షాకాలం ముందస్తు చర్యలపై సమీక్షించారు.