నర్మెట ఆయిల్ పామ్ ఫ్యాక్టరీ: రైతులకు గ్యారెంటీ మార్కెట్, 500 మందికి ఉపాధి

సిద్దిపేట జిల్లా నంగనూరు మండలం నర్మెటలో ఏర్పాటైన ఆయిల్ పామ్ ప్రాసెసింగ్ ఫ్యాక్టరీ విజయవంతంగా నడుస్తోంది. తెలంగాణ ఆయిల్ ఫెడ్ ఆధ్వర్యంలో 62 ఎకరాల విస్తీర్ణంలో 300 కోట్ల రూపాయలతో ఈ ఫ్యాక్టరీ నిర్మించబడింది. 2025 సెప్టెంబర్‌లో ట్రైల్ రన్ చేయగా, మార్చి 22న ఫ్యాక్టరీని అధికారికంగా ప్రారంభించారు.

ప్రారంభం నుంచి ఇప్పటివరకు 25,890 మెట్రిక్ టన్నుల తాజా పామ్ పండ్ల గుత్తులు ప్రాసెసింగ్ చేయగా, 4,612.305 మెట్రిక్ టన్నుల క్రూడ్ పామ్ ఆయిల్ ఉత్పత్తైంది. వీటితోపాటు 2,370 మెట్రిక్ టన్నుల పామ్ గింజల నుంచి 396.145 మెట్రిక్ టన్నుల క్రూడ్ పామ్ కర్నెల్ ఆయిల్ కూడా తీశారు. ప్రస్తుతం ఫ్యాక్టరీ గంటకు 80 టన్నుల క్రషింగ్ సామర్థ్యంతో పనిచేస్తోంది. సమీప భవిష్యత్తులో దీనిని 120 టన్నులకు పెంచాలని నిర్వాహకులు లక్ష్యంగా పెట్టుకున్నారు. ఏడాదికి లక్ష టన్నుల క్రషింగ్ లక్ష్యంగా పనిచేస్తున్నారు.

ఈ ఫ్యాక్టరీ స్థానిక రైతులకు హామీ మార్కెట్ కల్పిస్తోంది. గతంలో రైతులు పంటను అమ్ముకోవడానికి ఇబ్బంది పడేవారు, ఇప్పుడు ఫ్యాక్టరీకే నేరుగా అమ్ముకోవచ్చు. ఉపాధి అవకాశాలు కూడా గణనీయంగా పెరిగాయి. ప్రత్యక్షంగా 500 మందికి, పరోక్షంగా 2000 మందికి పైగా ఉపాధి లభిస్తోంది. జిల్లాలో 14,000 ఎకరాల్లో ఆయిల్ పామ్ సాగు జరుగుతుండగా, 5,800 ఎకరాల్లో గెలలు కోత దశకు వచ్చాయి. 2026-27లో మరో 4,000 ఎకరాల సాగు లక్ష్యంగా ఉంది. ఇప్పటికే 600 ఎకరాల్లో కొత్త తోటలు వేశారు.

ఫ్యాక్టరీ ఆవరణలో 2 ఎకరాల విస్తీర్ణంలో 40 కోట్ల రూపాయలతో రిఫైనరీ నిర్మాణం జరుగుతోంది. ఇది పూర్తయితే క్రూడ్ పామ్ ఆయిల్ ను రిఫైన్ చేసి ప్యాకింగ్ చేసి నేరుగా మార్కెట్‌కు పంపిణీ చేస్తారు. నర్మెట ఫ్యాక్టరీ ద్వారా రాష్ట్రంతోపాటు దేశంలో వంట నూనె దిగుమతుల భారం తగ్గుతుందని అధికారులు అంచనా వేస్తున్నారు.