నాసిక్ త్రయంబకేశ్వర్ కుంభమేళ శనివారం ప్రారంభం; రాష్ట్రపతి ముర్ము హాజరు

మహారాష్ట్రలోని నాసిక్ త్రయంబకేశ్వర్ సింహస్థ కుంభమేళ శనివారం అధికారికంగా ప్రారంభం కానుంది. రామకుండ్ సమీపంలో మధ్యాహ్నం 12 గంటలకు ధ్వజారోహణ వేడుక జరుగుతుంది. ఈ చారిత్రక వేడుకతో కుంభమేళ ప్రారంభమవుతుంది.

ధ్వజారోహణ కార్యక్రమానికి రాష్ట్రపతి ద్రౌపది ముర్ము ముఖ్య అతిథిగా హాజరవుతారు. వేడుక కోసం మహారాష్ట్ర ప్రభుత్వం భారీ ఏర్పాట్లు చేస్తోంది.

కుంభమేళలో 13 ప్రధాన అఖాడాలు పాల్గొంటున్నాయి. మొత్తం మూడు అమృత స్నానాలు, 45 కుంభ స్నానాలు ఉంటాయి. కుంభమేళ నేపథ్యంలో గోదావరి నది ప్రక్షాళన కార్యక్రమం కొనసాగుతోంది. తపోవన్‌లో భక్తుల కోసం ప్రత్యేక ఏర్పాట్లు చేశారు.

నాసిక్, త్రయంబకేశ్వర్ పంచవటిలో సంయుక్తంగా ఈ కుంభమేళ జరుగుతుంది. ఇది 21 నెలల పాటు కొనసాగి 2028 జూలైలో ముగుస్తుంది.

ప్రయాగ్రాజ్‌లో కుంభమేళకు 10 వేల ఎకరాలు అందుబాటులో ఉండగా, నాసిక్‌లోని సాధుగ్రామ్ ప్రాంతం 350 ఎకరాలే. రామకుండ్ ఘాట్ 100 ఎకరాల విస్తీర్ణంలో ఉంది. స్థలం ఇరుకైనందున భక్తులు వేర్వేరు సమయాల్లో రావాలని నిర్వాహకులు భావిస్తున్నారు. దీనివల్ల జన సమూహ నిర్వహణ మెరుగవుతుందని వారి అంచనా.