65 వేల లంచం తీసుకుంటూ పట్టుబడిన రాజమహేంద్రవరం అగ్నిమాపక అధికారి

రాజమహేంద్రవరంలోని అగ్నిమాపక శాఖ కార్యాలయంపై అవినీతి నిరోధక శాఖ (ACB) అధికారులు మెరుపు దాడి చేశారు. జిల్లా అగ్నిమాపక సహాయ అధికారి పి. శ్రీనివాసరావు 65,000 రూపాయలు లంచం తీసుకుంటుండగా రెడ్ హ్యాండెడ్ గా పట్టుబడ్డారు.

దీపావళి సందర్భంగా టపాసుల విక్రయ దుకాణం ఏర్పాటు చేసుకోవడానికి అనుమతి కోసం వచ్చిన వ్యక్తి నుండి NOC జారీ చేయడానికి 65,000 రూపాయలు డిమాండ్ చేశారు. లంచం ఇవ్వకపోతే దుకాణంపై చర్యలు తీసుకుంటామని బెదిరించారు.

దీంతో ఫిర్యాదుదారుడు ACB అధికారులను సంప్రదించారు. ఫిర్యాదు స్వీకరించిన ACB అధికారులు వెంటనే వలపన్ని, ఫిర్యాదుదారుడు 65,000 రూపాయలు అందజేస్తుండగా శ్రీనివాసరావును రెడ్ హ్యాండెడ్ గా అరెస్టు చేశారు. కెమికల్ టెస్ట్ లో కూడా పాజిటివ్ రావడంతో లంచం తీసుకున్నట్టు నిరూపితమైంది.

ప్రభుత్వ సంస్థల్లో ఎవరైనా లంచం డిమాండ్ చేస్తే వెంటనే ACB కి సమాచారం అందించాలని అధికారులు పిలుపునిచ్చారు.