సంగారెడ్డి జిల్లాలో నవోదయ విద్యాలయం ఏర్పాటుకు నేతల విభేదాలతో ఆలస్యం

కేంద్రం నూతనంగా మంజూరు చేసిన జవహర్ నవోదయ విద్యాలయాల్లో సంగారెడ్డి జిల్లాలోని పాఠశాల ఇంకా ప్రారంభం కాలేదు. మంత్రి దామోదర రాజనరసింహ, ఎంపీ రఘునందన్ రావు పాఠశాల ఏర్పాటు చేసే స్థలం విషయంలో విభేదించడంతో ఆలస్యమైనట్లు తెలుస్తోంది.

గతేడాది తెలంగాణలో ఏడు జిల్లాల్లో నవోదయ విద్యాలయాలు మంజూరు చేశారు. అయితే, మిగిలిన ఆరు జిల్లాల్లో పాఠశాలలు ప్రారంభమైనా సంగారెడ్డిలో మాత్రం ప్రారంభం కాలేదు. పాఠశాల ఏర్పాటుకు 25 ఎకరాల స్థలాన్ని నవోదయ సమితికి బదలాయించాల్సి ఉంటుంది. తాత్కాలికంగా సుల్తాన్పూర్లోని జేఎన్టీయూలో తరగతులు ప్రారంభించే ప్రణాళిక కూడా కార్యరూపం దాల్చలేదు.

మంత్రి దామోదర రాజనరసింహ తన ఆందోల్ నియోజకవర్గంలో పాఠశాల ఏర్పాటు చేయాలని కోరుతున్నారు. ఎంపీ రఘునందన్ రావు మాత్రం పటాన్చెరు నియోజకవర్గం అమీన్పూర్లో ఏర్పాటుచేయాలని ప్రతిపాదిస్తున్నారు. జహీరాబాద్, నిజాంపేట మండలం బాచేపల్లి, జోగిపేట తదితర ప్రాంతాల్లో ప్రభుత్వ స్థలాలను పరిశీలించినా సరైన నిర్ణయం తీసుకోలేకపోతున్నారు. విద్యార్థుల భవిష్యత్తు దృష్ట్యా త్వరగా నిర్ణయం తీసుకోవాలని తల్లిదండ్రులు కోరుతున్నారు.