ప్రభుత్వ వాహనంలో ఏసీ పెట్టుకున్న ఇద్దరు; నెల్లూరు కలెక్టర్ హిమాంశు శుక్లా ఆగ్రహం

నెల్లూరు జిల్లా కలువాయి మండలం కొల్లూరు గ్రామంలో జిల్లా కలెక్టర్ హిమాంశు శుక్లా పల్లె వీక్షణ కార్యక్రమంలో పాల్గొన్నారు. ఈ సందర్భంగా ఒక ప్రభుత్వ వాహనం ఇంజిన్ ఆన్ చేసి, లోపల ఇద్దరు వ్యక్తులు ఏసీ వేసుకుని కూర్చొని ఉన్నారు.

కలెక్టర్ ముందుగా హెల్త్ సెంటర్‌ను సందర్శించి, అనంతరం ప్రజల అర్జీల స్వీకరణకు నడుచుకుంటూ వెళ్తుండగా ఈ ఘటన వెలుగులోకి వచ్చింది. చెట్టు కింద నిలిపి ఉన్న 'ఆన్ బోర్డ్ డ్యూటీ' అని రాసి ఉన్న ప్రభుత్వ వాహనం లోపల డ్రైవర్, మరో వ్యక్తి ఉన్నట్లు కలెక్టర్ గుర్తించారు. వెంటనే వారిని కారు దిగాలని ఆదేశించి, ప్రభుత్వ ధనం దుర్వినియోగంపై తీవ్ర ఆగ్రహం వ్యక్తం చేశారు. తాము ఫోన్ చార్జింగ్ చేస్తున్నామని వారు చెప్పినా కలెక్టర్ హెచ్చరించి వెళ్లిపోయారు.

ఇటీవల రాష్ట్ర ప్రభుత్వం పొదుపు చర్యల్లో భాగంగా ప్రభుత్వ వాహనాల వినియోగం తగ్గించాలని, శుక్రవారం వాహనాలు వదిలేయాలని అధికారులకు సూచించింది. సీఎం చంద్రబాబు, మంత్రులు కూడా తమ కాన్వాయ్‌లను తగ్గించుకున్నారు. కానీ కిందిస్థాయిలో కొందరు దీనిని పట్టించుకోవడం లేదని, ప్రతి ఒక్కరూ బాధ్యతగా తీసుకోవాలని కలెక్టర్ హిమాంశు శుక్లా స్పష్టం చేశారు.