నెల్లూరు పోలీసులపై వరుస వివాదాలు; కస్టోడియల్ మరణం ఆరోపణలు

నెల్లూరు జిల్లా పోలీస్ శాఖ వరుస వివాదాల్లో చిక్కుకుంది. గత సంవత్సరం నుంచి పలు ఆరోపణలు రావడం చర్చనీయాంశంగా మారింది. కస్టోడియల్ మరణం, కస్టోడియల్ టార్చర్, అధికార దుర్వినియోగం వంటి తీవ్రమైన అభియోగాలు వ్యక్తమవుతున్నాయి.

కొండాపురం ఎస్ఐ కాసుల శ్రీనివాసరావు తనను కస్టోడియల్ టార్చర్ చేశారని రవీంద్ర రెడ్డి అనే వ్యక్తి ఆరోపించాడు. ఈ ఘటనపై పోలీస్ శాఖ స్పందించలేదని విమర్శలు వస్తున్నాయి.

పొదలకూరు ఎస్ఐ హనీఫ్ (ప్రస్తుతం మనుబోలు పోలీస్ స్టేషన్లో) వైఎస్ఆర్ కాంగ్రెస్ పార్టీకి చెందిన ఒక రైతును స్టేషన్ కు తీసుకొచ్చి కొట్టారని, ఆ తర్వాత టీడీపీ నేతలకు వీడియో కాల్ చేసి చూపించారని మాజీ మంత్రి కాకాని గోవర్ధన్ రెడ్డి ఆరోపించారు. అదే ఎస్ఐ, చోరీ కేసులో ఏడుకొండలు అనే నిందితుడిని కొట్టడంతో అతను మరణించాడని, ఈ కొట్టడంలో పొదలకూరు ఎస్ఐ రాకేష్ కూడా పాల్గొన్నారని బంధువులు ఆరోపిస్తున్నారు.

బుచ్చిరెడ్డిపాళెం ఎఎస్ ఐ శ్రీహరి హత్య కేసులో, నిందితుడు హరికృష్ణ దగ్గర నుంచి పోలీసులు పెద్ద మొత్తంలో డబ్బు తీసుకొని కేసును తారుమారు చేసే ప్రయత్నం చేశారని ఆరోపణలు రాగా, సీఐ శ్రీనివాసరావును సస్పెండ్ చేసి ఇతర సిబ్బందిని బదిలీ చేశారు. హరికృష్ణను వెంటనే అరెస్ట్ చేసి ఉంటే, అతడు ఆత్మహత్య చేసుకునే పరిస్థితిని నివారించవచ్చని విమర్శలు వ్యక్తమవుతున్నాయి.

ఈ సంఘటనల నేపథ్యంలో, రాజకీయ వేదింపులో భాగంగా తమపై అక్రమ కేసులు పెడుతున్నారని వైఎస్ఆర్సీపీ నేతలు ఆరోపిస్తున్నారు. టీడీపీ నేతల ఆదేశాల మేరకు పోలీసులు ప్రవర్తిస్తున్నారని వారు విమర్శిస్తున్నారు. ఈ విషయంపై పోలీస్ శాఖ అధికారిక స్పందన రావాల్సి ఉంది.