హైదరాబాద్: మల్కాజ్‌గిరి కమిషనరేట్‌లో నేపాలీ గ్యాంగ్‌లు పరారీ — పోలీసులు గాలింపు

హైదరాబాద్ మల్కాజ్‌గిరి కమిషనరేట్ పరిధిలో రెండు వేర్వేరు కేసుల్లో నేపాలీ గ్యాంగ్‌లు నేరాలు చేసి పారిపోయాయి. ఇప్పటివరకు నిందితుల ఆచుకి లభించలేదు. పోలీసులు ప్రత్యేక బృందాలతో గాలింపు చర్యలు ముమ్మరం చేశారు.

మొదటి కేసు ఈ నెల 8వ తేదీన జరిగింది. మాజీ IPS అధికారి వినయ్ రంజన్ రే భార్య సునంద ఇంట్లో హత్యకు గురైంది. సుమారు ఎనిమిది నెలల క్రితం నేపాల్‌కు చెందిన కల్పన అనే మహిళ ఆ ఇంట్లో పనిమనిషిగా చేరింది. సునంద ఒంటరిగా ఉన్న సమయం కోసం ఎదురుచూసి, 8వ తేదీన ఆమె నోట్లో గుడ్డలు కుక్కి, చేతులు కట్టేసి, ఇంట్లో వస్తువులు దోచుకొని పారిపోయింది. రెక్కీ చేసి CC కెమెరాలకు చిక్కకుండా పార్క్ వెనక రాళ్ల మీదుగా ఆటోలో పారిపోయినట్లు పోలీసులు గుర్తించారు. ఈ కేసులో కల్పనతో పాటు మరో నలుగురు నేపాలీలు పరారీలో ఉన్నారు.

రెండో కేసులో ప్రొఫెసర్ మురళీ మోహన్, డాక్టర్ విజయలక్ష్మి దంపతుల ఇంట్లో నేపాలీ దంపతులు పనిమనుషులుగా చేరారు. 20 రోజుల్లోనే మరో ఐదుగురు నేపాలీలతో కలిసి దోపిడీకి పథకం వేశారు. ప్రొఫెసర్ మురళీ మోహన్‌కు మత్తు మందు ఇచ్చి, డాక్టర్ విజయలక్ష్మిని బెదిరించి దోపిడీ చేశారు. 15 గంటల తర్వాత విజయలక్ష్మి అరుపులు విన్న స్థానికులు ఆమెను కాపాడారు. ఈ కేసులో రాజేష్, సబీనా, మమత తదితర ఏడుగురు నేపాలీలు జవహర్‌నగర్ పోలీస్ స్టేషన్ పరిధిలో పరారీలో ఉన్నారు. ఇందులో మమత గతంలో మోయినాబాద్ పరిధిలో దోపిడీ కేసులో జైలుకు వెళ్లి వచ్చిన నేరస్తురాలు.

నిందితులు నేపాల్‌కు పారిపోయే అవకాశం ఉందని పోలీసులు భావిస్తున్నారు. రెండు కేసుల్లోనూ నిందితులకు ఆచుకి లభించేందుకు ప్రత్యేక బృందాలు దర్యాప్తు కొనసాగిస్తున్నాయి.