న్యూజర్సీలో దీపావళి వేడుకల అనంతరం రోడ్లపై బాణసంచా వ్యర్థాలు.. విమర్శలు

అమెరికాలోని న్యూజర్సీలో దీపావళి వేడుకల అనంతరం రోడ్లపై బాణసంచా వ్యర్థాలు పేరుకుపోవడం వివాదానికి దారితీసింది. జెస్సీ సిటీలోని ఇండియా స్ట్రీట్ వంటి ప్రాంతాల్లో ఖాళీ పెట్టలు, కాగితాలు, ఇతర వ్యర్థాలతో రోడ్లు నిండిపోయాయి.

సమాచారం అందుకున్న ఫైర్ సిబ్బంది హై ప్రెజర్ వాటర్ జెట్లను ఉపయోగించి రోడ్లపై పేరుకుపోయిన చెత్తను శుభ్రం చేశారు. రోడ్లపై పొగ కమ్ముకోవడంతో పరిస్థితి ఇబ్బందికరంగా మారింది. పోలీసులు ఘటనా స్థలానికి చేరుకుని పరిస్థితిని పర్యవేక్షించారు. స్థానికులు ఈ దృశ్యాలను గమనించారు.

ఈ ఘటనకు సంబంధించిన వీడియోలు సోషల్ మీడియాలో వ్యాప్తి చెందడంతో భిన్న అభిప్రాయాలు వ్యక్తమవుతున్నాయి. పండుగలు జరుపుకోవడం ముఖ్యమే అయినా పరిసరాలను పరిశుభ్రంగా ఉంచుకోవాల్సిన బాధ్యత అందరిపై ఉంటుందని కొందరు అన్నారు. విదేశాల్లో పండుగలు జరుపుకునేటప్పుడు స్థానిక నియమాలు, పబ్లిక్ ప్రదేశాలను గౌరవించాలని మరికొందరు సూచించారు. శబ్ద కాలుష్యం, ప్రజా భద్రత అంశాలపైనా చర్చ జరుగుతోంది. ఇదే ప్రాంతంలో గతంలోనూ దీపావళి తర్వాత ఇలాంటి దృశ్యాలు కనిపించాయని పలువురు గుర్తు చేస్తున్నారు.

మరోవైపు ఎడిసన్ వంటి ప్రాంతాల్లో సాంస్కృతిక కార్యక్రమాలతో కూడిన దీపావళి వేడుకలను అధికారికంగా నిర్వహించారు. ముందస్తు ప్రణాళికతో కూడిన ఫైర్ వర్క్స్ ప్రదర్శన ఇందులో భాగంగా జరిగింది. ఈ వేడుకలకు పెద్ద సంఖ్యలో ప్రజలు హాజరయ్యారు. తాజా ఘటనలపై స్థానిక అధికారులు ఇప్పటివరకు ఎలాంటి అధికారిక ప్రకటన విడుదల చేయలేదు.