నంద్యాలలో NIA విచారణ: మావోయిస్టు నేత జయమ్మ మృతిపై అనుమానాలు

నంద్యాల జిల్లా గడివేముల, పరమటూరు గ్రామాల్లో NIA అధికారులు మావోయిస్టు నాయకురాలు నామాల జయమ్మ (అలియాస్ అరుణ)కు సంబంధించిన వివరాలు సేకరించారు. ఆమె తల్లిదండ్రులు, బంధువులను ప్రశ్నించారు. స్థానిక విఆర్వో నుంచి రికార్డులు నమోదు చేసుకున్నారు.

రెండేళ్ల క్రితం కేరళలో జరిగిన ఎన్కౌంటర్‌లో జయమ్మ చనిపోయినట్టు అప్పట్లో ప్రకటించారు. ఈ మరణాన్ని కేరళ ప్రభుత్వం, మావోయిస్టు పార్టీ కూడా నిర్ధారించాయి. అయితే జయమ్మ కుటుంబానికి మాత్రం అధికారిక సమాచారం అందలేదు.

జయమ్మ, ఆమె భర్త నామాల భాస్కర్ గతంలో నల్లమల అడవుల్లో మావోయిస్టు ఉద్యమంలో చేరారు. తర్వాత విభేదాలు రావడంతో భాస్కర్ పోలీసులకు లొంగిపోయాడు. 2007లో నల్లమలలో ఉద్యమం బలహీనపడటంతో జయమ్మ ఏవోబీ (ఆంధ్ర-ఒడిశా సరిహద్దు) ప్రాంతానికి వెళ్లిపోయింది. ఎనిమిదేళ్ల క్రితం భాస్కర్ అనారోగ్యంతో మరణించాడు.

ఇప్పుడు NIA అధికారులు గ్రామాల్లో విచారణ చేపట్టడంతో జయమ్మ జీవించి ఉండవచ్చనే ఊహాగానాలు వెలువడుతున్నాయి. ఈ విషయమై NIA ఎలాంటి అధికారిక ప్రకటన చేయలేదు. కుటుంబ సభ్యులు స్పందించలేదు.