అమరావతిలో NIFT, AP కి టెక్స్టైల్ హబ్ హోదా — కేంద్రం సానుకూలం

AP CM చంద్రబాబు నాయుడు సచివాలయంలో కేంద్ర జౌళి శాఖ మంత్రి గిరిరాజ్ సింగ్‌తో సమావేశమయ్యారు. ఈ భేటీలో వస్త్ర పరిశ్రమ అభివృద్ధికి సంబంధించిన పలు ప్రతిపాదనలు కేంద్రం ముందు ఉంచారు.

అమరావతిలో National Institute of Fashion and Technology (NIFT) ఏర్పాటుకు ఇప్పటికే 10 ఎకరాల భూమి కేటాయించినట్టు CM చంద్రబాబు తెలిపారు. నిర్మాణానికి అవసరమైన ₹280 కోట్లు వెంటనే విడుదల చేయాలని కేంద్రాన్ని కోరారు.

కుప్పంలో PM MITRA Park 2.0, మంగళగిరిలో ₹22.36 కోట్లతో చేనేత పార్క్, అమరావతిలో చేనేత-హస్తకళల museum ఏర్పాటు చేయాలని కూడా విజ్ఞప్తి చేశారు.

రాష్ట్రంలో అరటి కాండం, వెదురు, కొబ్బరి పీచు వంటి వ్యవసాయ వ్యర్థాలను వాణిజ్యపరంగా వినియోగించుకునేందుకు National Natural Fibre Mission కింద AP ని ప్రాధాన్యత రాష్ట్రంగా గుర్తించాలని కోరారు. దీని ద్వారా రైతులకు అదనపు ఆదాయం వస్తుందని CM వివరించారు.

ఈ ప్రతిపాదనలపై కేంద్ర మంత్రి గిరిరాజ్ సింగ్ సానుకూలంగా స్పందించారు. AP జౌళి రంగం అభివృద్ధికి కేంద్రం పూర్తి సహకారం అందిస్తుందని హామీ ఇచ్చారు.