TIMS లో 184 పోస్టుల భర్తీకి NIMS మూడు నోటిఫికేషన్లు విడుదల; పద్మ అవార్డుల ప్రధానోత్సవం గ్రాండ్‌గా నిర్వహణ

సనత్ నగర్ TIMS లో 184 కాంట్రాక్ట్ పోస్టుల భర్తీకి NIMS మూడు వేర్వేరు నోటిఫికేషన్లు విడుదల చేసింది. NIMS తరహాలో TIMS ను తీర్చిదిద్దాలని నిర్ణయించిన ప్రభుత్వం రిక్రూట్‌మెంట్ బాధ్యతలను కూడా NIMS కి అప్పగించింది. 31 మెడికల్ ఫ్యాకల్టీ పోస్టులు, 122 టెక్నికల్ అలైడ్ హెల్త్ అడ్మినిస్ట్రేటివ్ పోస్టులు, 31 ఇతర సపోర్ట్ ఇంజనీరింగ్ సెక్యూరిటీ లీగల్ పోస్టులు భర్తీ చేయనున్నారు. కార్డియాలజీ, నెఫ్రాలజీ, యూరాలజీ, న్యూరాలజీ, న్యూరో సర్జరీ వంటి సూపర్ స్పెషాలిటీ విభాగాల్లో ఈ పోస్టులు భర్తీ చేయనున్నారు.

తెలంగాణ రాష్ట్ర వ్యవసాయ శాఖ మంత్రి తుమ్మల నాగేశ్వరరావు, పౌర సరఫరాల శాఖ మంత్రి ఉత్తం కుమార్ రెడ్డి నేతృత్వంలోని బృందం ఢిల్లీలో పలువురు కేంద్ర మంత్రులను కలిసింది. కేంద్ర వ్యవసాయ శాఖ మంత్రి శివరాజ్ సింగ్ చౌహాన్‌ను కలిసిన మంత్రులు రాష్ట్రానికి తక్షణమే DAP యూరియా ఎరువులను పూర్తి స్థాయిలో సరఫరా చేయాలని విజ్ఞప్తి చేశారు. పప్పు ధాన్యాలు నూనె గింజల కొనుగోళ్లపై అమల్లో ఉన్న 25% పరిమితిని తొలగించాలని కూడా కేంద్రాన్ని కోరారు.

ముఖ్యమంత్రి రేవంత్ రెడ్డి కేంద్ర పట్టణ అభివృద్ధి శాఖ మంత్రి మనోహర్‌లాల్ ఖట్టర్‌తో భేటీ అయ్యారు. హైదరాబాద్ మెట్రో విస్తరణపై సుదీర్ఘంగా చర్చించారు. మెట్రో ఫేజ్ వన్ IRFC లోన్ అంశంపై కూడా చర్చించారు. మెట్రో ఫేజ్ విస్తరణ నిర్మాణ వ్యయం అంచనాకు కన్సల్టెంట్‌గా SBI Caps ను ఎంపిక చేశారు. కేంద్ర ప్రభుత్వం నుంచి ఒక అధికారి, రాష్ట్ర పట్టణ అభివృద్ధి శాఖ ప్రత్యేక కార్యదర్శి సమన్వయం చేసుకుంటారని నిర్ణయించారు. రైల్వే శాఖ మంత్రి అశ్విని వైష్ణవ్, కేంద్ర మంత్రి కిషన్ రెడ్డి కూడా ఈ సమావేశంలో పాల్గొన్నారు.

రాష్ట్రవ్యాప్తంగా విత్తన మేళాలు ప్రారంభమయ్యాయి. జూన్ 30వ తేదీ వరకు అన్ని రైతు వేదికల్లో మేళాలు నిర్వహిస్తారు. 24,000 క్వింటాల వరి విత్తనాలు, పప్పు, నూనె గింజలు, నానో యూరియాతో పాటు ఏడు రకాల సన్న వడ్లను ప్రదర్శిస్తున్నారు. యాసంగి పంటలో 80 లక్షల మెట్రిక్ టన్నుల వరి ధాన్యం కొనుగోలు చేయడం జరిగిందని మంత్రులు తెలిపారు.

రాష్ట్రపతి భవన్‌లో పద్మ అవార్డుల ప్రధానోత్సవం గ్రాండ్‌గా జరిగింది. రెండో విడతలో 65 మందికి పురస్కారాలు అందజేశారు రాష్ట్రపతి ద్రౌపది ముర్ము. వీరిలో ఇద్దరు పద్మ విభూషణ్, ఏడుగురు పద్మభూషణ్, 56 మంది పద్మశ్రీ అందుకున్నారు. తెలుగు రాష్ట్రాల నుంచి ప్రముఖ వైద్యుడు డాక్టర్ నోరి దత్తాత్రేయుడు పద్మభూషణ్ పురస్కారం అందుకున్నారు. సినీ నటులు మురళీ మోహన్, రాజేంద్ర ప్రసాద్ పద్మశ్రీ అవార్డు అందుకున్నారు. ప్రముఖ మలయాళ నటుడు మమ్ముట్టికి పద్మభూషణ్ అవార్డు దక్కింది. స్టార్ క్రికెట్ ప్లేయర్ రోహిత్ శర్మ కూడా పద్మశ్రీ అవార్డు స్వీకరించారు.