నిజామాబాద్‌లో ప్రభుత్వ పాఠశాలకు భారీ డిమాండ్: బోర్గాం స్కూల్‌లో 400 దరఖాస్తులు, అడ్మిషన్లు మూసివేత

నిజామాబాద్ జిల్లా బోర్గాం ప్రభుత్వ పాఠశాలలో కొత్త విద్యా సంవత్సరానికి అడ్మిషన్ల కోసం 400 మంది విద్యార్థులు దరఖాస్తు చేశారు. డిమాండ్ ఎక్కువగా ఉండటంతో అడ్మిషన్లను ముందే మూసేశారు.

గత సంవత్సరం 1,200 మంది విద్యార్థులు చదువుకున్న ఈ స్కూల్లో 223 మంది పదో తరగతి పూర్తి చేసి వెళ్లారు. ప్రభుత్వం 10% అడ్మిషన్లు పెంచాలనే లక్ష్యంతో మరో 100 మందికి అడ్మిషన్లు ఇవ్వాలని భావించింది. ఈ ఏడాది మార్చి నెల నుంచి దరఖాస్తులు స్వీకరించగా, స్కూల్ ప్రారంభమైన రోజున అడ్మిషన్లు మూసివేశారు.

తల్లిదండ్రులు ప్రైవేట్ స్కూల్ ఫీజులు కట్టలేక, కార్పొరేట్ స్థాయి బోధన ఉన్న ఈ స్కూల్ వైపు మొగ్గు చూపుతున్నారు. ఆరో తరగతి నుంచి పదో వరకు ఇంగ్లీష్ మీడియం విద్య, 22 సెక్షన్లు, 40 మంది టీచర్లు ఉన్నాయి. కొందరు ఇంతకుముందు ప్రైవేట్ స్కూల్లలో చదివించినా నాణ్యత లేకపోవడంతో ఇక్కడికి మార్చినట్లు తల్లిదండ్రులు తెలిపారు.

ఈ స్కూల్ వరుసగా 10వ తరగతిలో 100% ఉత్తీర్ణత సాధిస్తోంది. పాలిటెక్నిక్ కోర్సులకు ఎక్కువ మంది విద్యార్థులు ఎంపికవుతున్నారు. వృత్తి విద్యా కోర్సులు కూడా నిర్వహిస్తున్నారు. విద్యార్థుల సంఖ్య పెరగడంతో గదుల కొరత ఏర్పడినా, విద్యార్థులకు ఇబ్బందులు రాకుండా జాగ్రత్తలు తీసుకుంటున్నారు.

నిజామాబాద్ జిల్లా వ్యాప్తంగా 10 వేల మంది విద్యార్థులను ప్రభుత్వ పాఠశాలల్లో చేర్పించాలన్న లక్ష్యం ఉండగా, ఒక్క బోర్గాం స్కూల్లోనే 400 దరఖాస్తులు రావడం గమనార్హం.