ఇందిరమ్మ గృహప్రవేశాల్లో నిజామాబాద్ జిల్లా మొదటి స్థానం; 3,301 ఇళ్లు పూర్తి

ఇందిరమ్మ ఇళ్ల నిర్మాణంలో నిజామాబాద్ జిల్లా రాష్ట్రంలో మొదటి స్థానంలో నిలిచింది.

సోమవారం జిల్లావ్యాప్తంగా 3,301 ఇళ్ల గృహప్రవేశాలు జరిగాయి. జిల్లాలో ఇప్పటివరకు 14,114 ఇందిరమ్మ ఇళ్లు మంజూరు కాగా, 3,301 పూర్తయ్యాయి. 2,097 ఇళ్లు పునాది స్థాయిలో, 129 ఇళ్లు గోడల స్థాయిలో, 5,440 ఇళ్లు స్లాబ్ స్థాయిలో ఉన్నాయి. కలెక్టర్లు రజత్ త్రిపాఠి, వినయ్ కృష్ణారెడ్డిలు ఈ నిర్మాణాలపై ప్రత్యేక దృష్టి సారించి నిరంతరం సమీక్షలు నిర్వహించారని అధికారులు తెలిపారు.

గతంలో డబుల్ బెడ్రూమ్ పథకం కింద తాము చాలాసార్లు దరఖాస్తు చేసుకున్నా ఇల్లు రాలేదని, ప్రస్తుత ప్రభుత్వం ఇల్లు మంజూరు చేసి గృహప్రవేశం చేయించడం సంతోషంగా ఉందని లబ్ధిదారులు పేర్కొన్నారు. వారు రేవంత్ రెడ్డి, భూపతి రెడ్డిలకు కృతజ్ఞతలు తెలిపారు.

నిజామాబాద్ రూరల్ ఎమ్మెల్యే భూపతిరెడ్డి మాట్లాడుతూ, ఈరోజు రాష్ట్రంలో దాదాపు లక్ష ఇళ్ల గృహప్రవేశాలు జరుగుతున్నాయని తెలిపారు. ప్రతిపక్షాలు విమర్శలు చేస్తున్నా నిర్మాణాలు యథావిధిగా కొనసాగుతాయని చెప్పారు. రెండో విడతలో మరిన్ని ఇళ్లు మంజూరు చేస్తామని, పేదవారికి ఐదు లక్షల రూపాయల ఆర్థిక సాయంతో 400-600 చదరపు అడుగుల ఇళ్లు నిర్మిస్తారని వివరించారు. ఇల్లు లేని పేదలు లేకుండా చేయడమే లక్ష్యమన్నారు.