నిజామాబాద్, కామారెడ్డి జిల్లాల్లో 46°C వరకు ఉష్ణోగ్రతలు నమోదు

నిజామాబాద్ జిల్లాలోని బీంగల్ మండలంలో 46°C ఉష్ణోగ్రత నమోదైంది. ఇది ఈ సీజన్‌లో జిల్లాలో నమోదైన అత్యధిక ఉష్ణోగ్రత. బాల్కొండ మెండోరాలో 45.8°C, మైలారం మండలంలోని కోరట్పల్లిలో 45.8°C నమోదయ్యాయి.

కామారెడ్డి జిల్లా మద్నూరులో 46°C, డోంగ్లీలో 45.8°C ఉష్ణోగ్రతలు నమోదయ్యాయి. బిచ్చుకుంద ప్రాంతంలో 45.5°C, కామారెడ్డి పట్టణంలో 45°C పైన నమోదైంది. జక్రానపల్లి, దర్పల్లి మండలాల్లోనూ ఉష్ణోగ్రతలు పెరిగాయి.

గత నెల రోజులుగా నిజామాబాద్ జిల్లాలో 43°C పైన ఉష్ణోగ్రతలు నమోదవుతున్నాయని అధికారులు తెలిపారు. ఈ సీజన్‌లో రెండుసార్లు 46°C మార్కు దాటిన జిల్లా నిజామాబాద్ మాత్రమే అని చెప్పారు. రాత్రి 8 గంటల వరకూ వడగాలుల ప్రభావం ఉంటోందని అధికారులు పేర్కొన్నారు.

ఉదయం 10 గంటల తర్వాత రోడ్లు ఖాళీగా మారుతున్నాయి. సాయంత్రం 6 గంటల వరకు తీవ్రమైన ఎండ కొనసాగుతోంది. అత్యవసర పనులు, వైద్య అవసరాలకు మాత్రమే జనం బయటకు వస్తున్నారు. చిరు వ్యాపారస్తులు, ఆటో చోదకులు ఎండల వల్ల నష్టపోతున్నారని స్థానికులు తెలిపారు.