కూరలో గడ్డిమందు కలిపి భర్త, అత్తను చంపేందుకు ప్రయత్నం: నిజామాబాద్‌లో మహిళ అరెస్ట్

నిజామాబాద్ జిల్లా మోపాల్ మండలం మెదక్పల్లి గ్రామంలో శనివారం ఓ మహిళ భర్త, అత్తను చంపేందుకు ప్రయత్నించింది. కూరలో గడ్డి మందు కలిపి వారికి వడ్డించింది.

పోలీసులు తెలిపిన వివరాల ప్రకారం, పొట్టోల్ల భూమన్న అనే వ్యక్తి తన భార్య సోనీ, తల్లి భూదేవితో కలిసి నివాసం ఉంటున్నారు. సోనీకి వేరొక వ్యక్తితో వివాహేతర సంబంధం ఉండేది. తమ బంధానికి భర్త, అత్త అడ్డుగా ఉన్నారని భావించిన సోనీ, వారిని చంపాలని పథకం వేసింది.

శనివారం సోనీ కూర వండి, అందులో గడ్డి మందు కలిపింది. ఆ కూర తిన్న భూదేవికి వాంతులు, విరోచనాలు అయ్యాయి. భూమన్న తినడం మొదలుపెట్టగా, కూరలో పురుగుమందు వాసన రావడంతో అనుమానం వచ్చి తినడం ఆపేశాడు. ఆయనకు తలతిరగడం మొదలైంది. ఇద్దరినీ నిజామాబాద్ ప్రభుత్వ ఆసుపత్రికి తరలించగా, సకాలంలో వైద్యం అంది ప్రాణాపాయం నుంచి బయటపడ్డారు.

ఘటనపై ఫిర్యాదు రావడంతో పోలీసులు సోనీని అదుపులోకి తీసుకుని విచారించారు. విచారణలో సోనీ నేరాన్ని అంగీకరించింది. ఆమెను అరెస్టు చేసి కోర్టులో హాజరుపరిచినట్లు ఎస్ఐ సుస్మిత తెలిపారు.