ఉత్తరాదిలో భారీ వర్షాలు, వరదలు; గుజరాత్, ఉత్తరాఖండ్, హిమాచల్లో తీవ్ర ప్రభావం
ఉత్తరాది రాష్ట్రాల్లో భారీ వర్షాలతో వరదలు, కొండచరియలు విరిగిపడే ఘటనలు చోటుచేసుకుంటున్నాయి. గుజరాత్, ఉత్తరాఖండ్, హిమాచల్ ప్రదేశ్, జమ్మూ కాశ్మీర్ తదితర రాష్ట్రాలు తీవ్రంగా ప్రభావితమయ్యాయి.
గుజరాత్లో సూరత్ నగరం వరద నీటిలో చిక్కుకుంది. పలు నివాస ప్రాంతాలు ముంపునకు గురయ్యాయి. వాతావరణ శాఖ రాబోయే 24 గంటలకు రెడ్ అలర్ట్ జారీ చేసింది. అహ్మదాబాద్ మున్సిపల్ కార్పొరేషన్ పరిధిలో స్కూళ్లు, కాలేజీలకు సెలవు ప్రకటించారు. లోతట్టు ప్రాంతాల ప్రజలను సురక్షిత ప్రాంతాలకు తరలించినట్లు అధికారులు తెలిపారు.
ఉత్తరాఖండ్లో రుద్రప్రయాగ్, కేదార్నాథ్ ప్రాంతాల్లో భారీ వర్షాలతో కొండచరియలు విరిగిపడుతున్నాయి. పలుచోట్ల రోడ్లు తెగిపోయాయి. కేదార్నాథ్ యాత్రను అధికారులు నిలిపివేశారు. యాత్రికులను సురక్షిత ప్రాంతాలకు తరలించారు.
హిమాచల్ ప్రదేశ్లో మండీ జిల్లాలో బియాస్ నది ఉద్ధృతంగా ప్రవహిస్తోంది. 58 రోడ్లు దెబ్బతిన్నాయి. కులు, సిర్మౌర్, సిమ్లా జిల్లాల్లోనూ రోడ్లు ధ్వంసమయ్యాయి. రాష్ట్రవ్యాప్తంగా అధికారులు ఆరెంజ్ అలర్ట్ జారీ చేశారు.
జమ్మూ కాశ్మీర్లో అనంతనాగ్, ఉదంపూర్ జిల్లాల్లో కొండచరియలు విరిగిపడడంతో జమ్మూ-శ్రీనగర్ జాతీయ రహదారిని మూసివేశారు. రియాసీ జిల్లాలో చినాబ్ నదిపై ఉన్న సలాల్ డ్యామ్ నిండింది. ప్రాజెక్టు గేట్లు తెరిచి నీటిని విడుదల చేస్తున్నట్లు అధికారులు చెప్పారు.
ఛత్తీస్గడ్లోని నారాయణపూర్ జిల్లా అడవుల్లోని సీఆర్పీఎఫ్ క్యాంప్ వరద నీటిలో చిక్కుకుంది. జవాన్లు చెట్లపైకి ఎక్కి ప్రాణాలు కాపాడుకున్నారు.
ఒడిశా, అస్సాం, పశ్చిమ బెంగాల్ తోపాటు ఛత్తీస్గడ్ లోనూ భారీ వర్షాలు కురుస్తున్నాయి. ఎగువ ప్రాంతాల్లో ఆకస్మిక వరదలు సంభవిస్తుండడంతో అధికారులు సహాయ చర్యలు చేపట్టారు.
వార్త ఆధారాలు: పబ్లిక్ న్యూస్ బ్రాడ్కాస్ట్లు, అధికారిక అప్డేట్లు, ఉషా కిరణం ఎడిటోరియల్ ప్రమాణాలు.
సవరణల కోసం సంప్రదించండి: help@ushakiranam.com
