ఎన్టీఆర్-త్రివిక్రం సినిమా: కుమార స్వామి జన్మస్థలం వివాదంలో పోస్టర్

NTR, త్రివిక్రం కాంబినేషన్‌లో తెరకెక్కుతున్న కొత్త సినిమా సెట్స్‌పైకి రాకముందే వివాదంలో చిక్కుకుంది. ఈ చిత్రంలో కుమార స్వామి జన్మస్థలం గురించి విడుదల చేసిన పోస్టర్ ట్యాగ్‌లైన్‌పై తమిళ వర్గాలు తీవ్ర అభ్యంతరం వ్యక్తం చేస్తున్నాయి.

చిత్ర యూనిట్ విడుదల చేసిన పోస్టర్‌లో “Born in the North, Forged in the Heartland, Worshipped in the South” అనే ట్యాగ్‌లైన్ ఇచ్చారు. దీనిపై NTK నాయకుడు సీమాన్ సహా పలువురు తమిళ రాజకీయ ప్రతినిధులు మండిపడుతున్నారు. కుమారస్వామి (కార్తికేయ) తమిళనాడులో జన్మించాడని తాము నమ్ముతున్నామని, ఈ ట్యాగ్‌లైన్‌తో తమ మనోభావాలు దెబ్బతిన్నాయని వారు ఆరోపిస్తున్నారు. సినిమాలో తప్పుడు సమాచారం చూపిస్తే విడుదలను అడ్డుకుంటామని సీమాన్ హెచ్చరించారు.

మరోవైపు హిందూ పురాణాల ప్రకారం కుమారస్వామి హిమాలయాల్లో జన్మించాడని కొన్ని వర్గాలు వాదిస్తున్నాయి. పోస్టర్‌లోని 'నార్త్' అనే పదం సరైనదేనంటూ సోషల్ మీడియాలో మద్దతు పోస్టులు కూడా వస్తున్నాయి. ఈ వివాదం రాజకీయ, సాంస్కృతిక చర్చకు దారితీసింది.

వివాదంపై ఇప్పటి వరకు చిత్ర యూనిట్ నుంచి ఎలాంటి అధికారిక స్పందన లేదు. అయితే సినిమాలో జన్మస్థలం ప్రస్తావనను తొలగించాలని నిర్మాతలు ఆలోచిస్తున్నట్లు సమాచారం. NTR ప్రస్తుతం 'డ్రాగన్' సినిమాతో బిజీగా ఉన్నారు. ఈ చిత్రం 2027లో మొదలయ్యే అవకాశం ఉంది.