ఆపరేషన్ క్లీన్ గోదావరి: పుష్కరాల నేపథ్యంలో గోదావరి శుద్ధికి వేగంగా చర్యలు

గోదావరి పుష్కరాలను కుంభమేళ తరహాలో నిర్వహించాలని సంకల్పించిన రాష్ట్ర ప్రభుత్వం ఆ దిశగా వేగంగా చర్యలు చేపట్టింది. కాలుష్యంతో నిండిపోయిన గోదావరి నదిని ప్రక్షాళన చేసేందుకు ఆపరేషన్ క్లీన్ గోదావరి పేరిట రకరకాల కార్యక్రమాలు అమలు చేస్తోంది.

రాజమహేంద్రవరం నగరం నుంచి వచ్చే మురుగునీటిని శుద్ధి చేసి గోదావరిలో కలిపేందుకు అత్యాధునిక సీవరేజ్ ట్రీట్మెంట్ ప్లాంట్ల నిర్మాణం వేగంగా జరుగుతోంది. నగరంలోని అన్ని వీధుల నుంచి వచ్చే మురుగు నీరు ఆవా ఛానల్ ద్వారా గోదావరిలో కలుస్తున్న నేపథ్యంలో ఆ ఛానల్ పై ప్రత్యేక మెకానిజం ఏర్పాటు చేశారు. దీని ద్వారా ప్లాస్టిక్ వంటి వ్యర్థాలను వేరు చేసి వేరే ప్లాంట్లో సంపద సృష్టించే కార్యక్రమం చేపడతారు.

50 ML సామర్థ్యం కలిగిన అత్యాధునిక సీవరేజ్ ట్రీట్మెంట్ ప్లాంట్ నిర్మాణంలో 90 శాతం పనులు పూర్తయ్యాయి. పక్కనే మరో 5 ML ప్లాంట్ కూడా నిర్మిస్తున్నారు. ప్రస్తుతం ఉన్న 30 ML ప్లాంట్తో కలిపి మొత్తం 85 ML మురుగునీటిని శుద్ధి చేసే సామర్థ్యం ఆగస్టు నాటికి అందుబాటులోకి వస్తుందని అధికారులు చెబుతున్నారు.

అయినప్పటికీ రాజమహేంద్రవరం నగరం నుంచి వచ్చే 100 ML మురుగును పూర్తిగా శుద్ధి చేసేందుకు మరో నాలుగు చోట్ల STP ప్లాంట్లు ఏర్పాటు చేయాలని ప్రభుత్వం నిర్ణయించింది. నగరవ్యాప్తంగా అండర్ గ్రౌండ్ డ్రైనేజీ వ్యవస్థ ఏర్పాటుకు కూడా ప్రతిపాదనలు సిద్ధమవుతున్నాయి. గోదావరి నది కాలుష్య రహితంగా ఉండేలా ప్రభుత్వం అన్ని చర్యలు తీసుకుంటోందని అధికారులు వివరించారు.