ఓర్వకల్ విమానాశ్రయంలో నైట్ ల్యాండింగ్, 343 ఎకరాల కమర్షియల్ జోన్ అభివృద్ధి

కర్నూలు ఓర్వకల్ విమానాశ్రయంలో రాత్రి ల్యాండింగ్ సౌకర్యం, భారీ వాణిజ్య ప్రాంతం అభివృద్ధికి రాష్ట్ర ప్రభుత్వం ప్రణాళిక సిద్ధం చేసింది. ఈ పనుల కోసం ఏపీ విమానాశ్రయాల అభివృద్ధి సంస్థ (APADCL) అంతర్జాతీయ బిడ్డింగ్ ప్రక్రియ ప్రారంభించింది.

విమానాశ్రయ పరిధిలోని మొత్తం 1068 ఎకరాల్లో 343 ఎకరాలను కమర్షియల్ జోన్‌గా మార్చనున్నారు. ఇక్కడ ఆధునిక వాణిజ్య భవనాలు, లాజిస్టిక్స్, ఏరోస్పేస్ తయారీ కేంద్రాలు వస్తాయి. భవిష్యత్తులో రన్వే, టెర్మినల్ విస్తరణకు అవసరమైన 136 ఎకరాలను ప్రభుత్వం ప్రత్యేకంగా కేటాయించింది.

విమానాశ్రయంలో పూర్తి స్థాయి నైట్ ల్యాండింగ్ సదుపాయం కోసం DVOR సాంకేతికతను ఏర్పాటు చేస్తున్నారు. ఫ్లైట్ ట్రైనింగ్ సంస్థ, డ్రోన్ల నిర్వహణ కేంద్రం, లైన్ బేస్ ఇంజిన్ సేవలు, ఎంఆర్వో మౌలిక సదుపాయాలు కూడా ఇక్కడ అభివృద్ధి చేయనున్నారు. ప్రయాణికులకే పరిమితం కాకుండా విమానాశ్రయాన్ని పూర్తి స్థాయి ఏవియేషన్ హబ్‌గా తీర్చిదిద్దే ప్రయత్నం జరుగుతోంది.

ఈ ప్రాజెక్ట్ కోసం అంతర్జాతీయ కాంపిటీటివ్ బిడ్డింగ్ ద్వారా డెవలపర్‌ను ఎంపిక చేస్తారు. ఎంపికైన సంస్థకు 45 ఏళ్ల రాయితీ ఒప్పందం కుదుర్చుకోనుండగా, అవసరమైతే మరో 15 ఏళ్లు పొడిగించే అవకాశం ఉంటుంది. రన్వే, టెర్మినల్, నావిగేషన్ యుటిలిటీల నిర్వహణ బాధ్యతను ఈ సంస్థే చూసుకోవాలి.

ఓర్వకల్ నోడులో 9000 ఎకరాల్లో అభివృద్ధి చేస్తున్న పారిశ్రామిక వాడకు ఈ విమానాశ్రయం అత్యంత సమీపంలో ఉంది. దీంతో దేశవిదేశీ పెట్టుబడులకు ఇది ప్రధాన ఆకర్షణగా మారే అవకాశం ఉందని అధికారులు భావిస్తున్నారు.