యూఎస్, ఇజ్రాయెల్ దాడిపై ఒవైసీ విమర్శ: ‘డొనాల్డ్ ట్రంప్ ప్రపంచ శాంతికి ముప్పు’

ఎంఐఎం చీఫ్, లోక్‌సభ ఎంపీ అసదుద్దీన్ ఒవైసీ అమెరికా, ఇజ్రాయెల్ దాడిని తీవ్రంగా ఖండించారు. సముద్రంలో ఒక నౌకపై జరిగిన ఈ దాడిలో ముగ్గురు భారతీయ నావికులు మృతి చెందిన విషయాన్ని గుర్తు చేస్తూ, అమెరికా అధ్యక్షుడు డొనాల్డ్ ట్రంప్ ప్రపంచ శాంతికే ముప్పు అని ఆయన వ్యాఖ్యానించారు. ‘అమెరికా, ఇజ్రాయెల్‌కు ఏ నౌకపైనైనా దాడి చేసే హక్కు లేదు. అది సైనిక నౌక అయినా సరే దాడి చేయడం తప్పు. ఇది పూర్తిగా గూండాగిరి, దాదాగిరి. ఇండియన్ ఫ్లాగ్ లేదన్న కారణంతో మన వాళ్ళు చనిపోవడాన్ని సమర్థించలేం’ అని ఒవైసీ అన్నారు.

ఈ ఘటనలో చనిపోయిన భారతీయుల కుటుంబాలు తీవ్రంగా బాధపడుతున్నాయని, వారిలో ఒకరి భార్య తన భర్త రాక కోసం ఎదురుచూస్తోందని ఒవైసీ ఆవేదన వ్యక్తం చేశారు. భారత ప్రభుత్వం స్పందించకపోవడంపైనా ఆయన అసంతృప్తి వెలిబుచ్చారు. ‘ప్రధాని నరేంద్ర మోదీ ఈ హత్యను ఖండిస్తూ ఒక్క మాట కూడా మాట్లాడలేదు. బదులుగా అమెరికా రాయబార కార్యాలయం నుంచి ఒక అధికారిని పిలిపించి డీమార్షి ఇచ్చారు. అది సరిపోదు. ఆ నౌక అంటుకున్నప్పుడు అక్కడి వ్యక్తులు సహాయం కోసం వేడుకున్నారు, మనం స్పందించలేదు’ అని ఒవైసీ విమర్శించారు.

కనీసం రక్షణ చర్యలు చేపట్టిన ఒమన్ ప్రభుత్వానికి ఒవైసీ కృతజ్ఞతలు తెలిపారు. ‘ఒమన్ సాయం చేయకపోతే, ఆ మనుషులు అంతా అప్పటికే చనిపోయేవారు. వారి సహాయాన్ని మేం మర్చిపోలేం’ అని ఆయన చెప్పారు. మృతుల కుటుంబాలకు న్యాయం చేయాలని, భారత ప్రభుత్వం ఈ విషయంలో మరింత గట్టిగా స్పందించాలని ఒవైసీ డిమాండ్ చేశారు.