మచిలీపట్నంలో ఆక్సిజన్ సిలిండర్ లీక్, రెండు బైక్లు, కారు ధ్వంసం

మచిలీపట్నంలోని ఈడేపల్లిలో ఆక్సిజన్ సిలిండర్ లీకై రెండు ద్విచక్ర వాహనాలు, ఒక కారు ధ్వంసమయ్యాయి. ఈ ఘటనలో ఇద్దరికి గాయాలయ్యాయి.

బెల్ కంపెనీ వెనుక ప్రాంతంలో ఓ ఆక్సిజన్ సిలిండర్ షాపులో లీకేజీ జరిగింది. లీకేజీ కారణంగా సిలిండర్ అదుపు తప్పి సమీపంలోని వాహనాలను ఢీ కొట్టింది.

స్థానికులు వెంటనే అగ్నిమాపక సిబ్బందికి సమాచారం ఇచ్చారు. హుటాహుటిన చేరుకున్న అగ్నిమాపక సిబ్బంది లీకేజీని అదుపులోకి తీసుకువచ్చారు. ఇది పెను ప్రమాదంగా మారే అవకాశం ఉండటంతో స్థానికులు ఆందోళన వ్యక్తం చేశారు.

ఘటనా స్థలంలో ఓ స్థానికుడు తెలిపిన ప్రకారం, ఈ ఆక్సిజన్ సిలిండర్ షాపు చాలా కాలంగా ప్రమాదకరంగా ఉంది. దీన్ని తరలించాలని గతంలో ఫిర్యాదులు చేసినా పట్టించుకోలేదు. సిలిండర్ లీకై రోడ్డుపై ఉన్న కారును ఢీ కొట్టిందని, కారు లేకపోతే మరింత దూరం వెళ్లి చాలా మంది గాయపడేవారని ఆయన చెప్పారు. గాయపడిన వారిలో ఒకరిని ఆంధ్ర హాస్పిటల్‌కు తరలించారు.