వరి సాగులో అధిక దిగుబడుల కోసం సమగ్ర యాజమాన్య పద్ధతులు: శాస్త్రవేత్త సూచనలు

ఖరీఫ్ వరి నాట్లు వేసిన రైతులు అధిక దిగుబడి సాధించాలంటే సమగ్ర యాజమాన్య పద్ధతులు పాటించాలని కృష్ణా జిల్లా ఘంటసాల కృషి విజ్ఞాన కేంద్రం శాస్త్రవేత్త రేవతి సూచిస్తున్నారు. ఈ పద్ధతులు నాట్లు వేసినప్పటి నుంచి పంట కోత వరకు పాటించాలి.

కలుపు నివారణకు నాట్లు వేసిన 3-5 రోజుల లోపు బెన్సల్ఫిరోథైల్ ప్లస్ ప్రెటిలాక్లోర్ 4 కిలోలు ఎకరానికి ఇసకతో కలిపి చల్లాలి. 15-20 రోజుల వయసులో గడ్డి జాతి కలుపులు ఉంటే సైహలోఫాప్ బ్యూటైల్ 400 మి.లీ. ఎకరానికి పిచికారీ చేయాలి. వెడల్పాటి, గడ్డి జాతి కలుపులు కలిసి ఉంటే బిస్పైరిబ్యాక్ సోడియం 100 మి.లీ. లేదా ట్రయోఫమోన్ ప్లస్ ఇథాక్సి సల్ఫిరోన్ 90 గ్రాములు ఎకరానికి వాడాలి. 25-30 రోజుల వయసులో వెడల్పాటి ఆకు కలుపులు ఎక్కువైతే 24డి సోడియం సాల్ట్ 400 గ్రాములు లేదా 24 అమైన్ సాల్ట్ 400 మి.లీ. ఎకరానికి 200 లీటర్ల నీటిలో కలిపి పిచికారీ చేయాలి.

ఎరువుల యాజమాన్యంపై శాస్త్రవేత్త మాట్లాడుతూ, నత్రజనిని మూడు దఫాలుగా—చివరి దమ్ములో, నాట్లు వేసిన నెల తర్వాత, అంకురం ఏర్పడే దశలో—అందించాలన్నారు. భాస్వరం ఎరువుగా సింగిల్ సూపర్ ఫాస్ఫేట్ 150 కిలోలు చివరి దమ్ములోనే ఇవ్వాలి. పొటాష్ 40 కిలోలు ఎకరానికి రెండు దఫాలుగా (మొదటి సారి 20 కిలోలు, అంకురం దశలో మరో 20 కిలోలు) ఎంఓపి రూపంలో అందించాలి. అధిక నత్రజని వాడకం వల్ల చీడపీడలు ఎక్కువయ్యే అవకాశం ఉన్నందున సమతుల్యంగా ఎరువులు వేయాలి.

నీటి యాజమాన్యంలో నాట్లు వేసిన తర్వాత 2-3 సెం.మీ. లోతు మేర పలుచని నీరు పెట్టాలి. పిలకలు వచ్చే వరకు ఇదే విధానం కొనసాగించాలి. చిరుపొట్ట దశలో 5 సెం.మీ. నీరు ఉంచాలి. కోతకు 10 రోజుల ముందు నీటిని పూర్తిగా ఎండగట్టాలి.

చీడపీడల నివారణకు కాండం తొలచు పురుగు, ఆకుముడత, సుడిదోమ, కంకినల్లి వంటి వాటిపై నివారణ చర్యలు చేపట్టాలి. నారుమడిలో కార్బోఫ్యూరాన్ 3జి గుళికలు సెంటుకు 160 గ్రా. వేయడం, నారు కొనలు తుంచి నాటడం వల్ల కాండం తొలచు పురుగు ఉదృతి తగ్గుతుంది. రసాయనాలుగా క్లోరాంట్రోనిలిప్రోల్ లేదా కాటాప్ హైడ్రోక్లోరైడ్ గుళికలు వాడాలి. ఆకుముడత పురుగుకు అవే మందులు పనిచేస్తాయి. సుడిదోమకు చెస్ 0.6 గ్రా./లీ. లేదా డైనోటెఫిరాన్ 0.4 గ్రా./లీ. పిచికారీ చేయాలి. కంకినల్లి నివారణకు ప్రొఫినోఫాస్ 2 మి.లీ./లీ. లేదా స్పైరోమెసిఫెన్ 1 మి.లీ./లీ. ఉపయోగించాలి. తెగుళ్ల విషయంలో అగ్గి తెగులుకు ట్రైసైక్లోజోల్ 0.6 మి.లీ./లీ., పొడ తెగులుకు హెక్సాకొనజోల్ 2 మి.లీ./లీ. లేదా అజాక్సిస్ట్రాబిన్ 1 మి.లీ./లీ., మానిపండు తెగులుకు ట్రోపిక్జోల్ 200 మి.లీ./ఎకరం పిచికారీ చేయాలి.