మహబూబ్‌నగర్ జిల్లాలో ధాన్యం కొనుగోళ్ళు ఆలస్యం — రైతులు తీవ్ర ఇబ్బందుల్లో

మహబూబ్‌నగర్ (ఉమ్మడి పాలమూరు జిల్లా) లో ధాన్యం కొనుగోళ్ళు నెల రోజులు గడిచినా జరగట్లేదు. లారీల కొరత వల్ల రైతులు కల్లాల వద్దే పడిగాపులు కాయాల్సి వస్తోంది.

పంట కోసి నెల రోజులు దాటినా ధాన్యం తరలించే లారీలు రావట్లేదని రైతులు చెబుతున్నారు. అప్పుడప్పుడు వచ్చే కొందరు లారీ డ్రైవర్లు బస్తాకు ₹1,000 నుండి ₹2,000 వరకు అదనంగా డిమాండ్ చేస్తున్నారని రైతులు ఆవేదన వ్యక్తం చేస్తున్నారు.

దొడ్డు రకం వడ్లు దించుకునేందుకు మిల్లర్లు నిరాకరిస్తున్నారు. దీంతో కొందరు రైతులు సొంత ఖర్చులతో ట్రాక్టర్లు మాట్లాడి మిల్లులకు తీసుకెళ్తున్నారు. అయినా మిల్లుల వద్ద కూడా ఆలస్యమవుతోందని వారు తెలిపారు.

మండుతున్న ఎండలకు టార్పాలిన్లు చిరిగిపోతున్నాయి. అకస్మాత్తుగా వర్షాలు పడి ధాన్యం తడిసే ప్రమాదం ఉందని రైతులు ఆందోళన చెందుతున్నారు. ధాన్యాన్ని రక్షించుకోవడానికి అన్ని పనులు వదిలి కల్లాల వద్దే ఉండాల్సి వస్తోందని చెప్తున్నారు.

వ్యవసాయ విస్తరణ అధికారులను సంప్రదించినా స్పందన లేదని రైతులు తెలిపారు. వేగంగా కొనుగోళ్ళు జరిపించాలని రైతులు అధికారులను కోరుతున్నారు. ఖరీఫ్ సీజన్ పనులు కూడా ఆలస్యమయ్యే అవకాశం ఉందని వారు హెచ్చరిస్తున్నారు.