పాకిస్తాన్‌లో టాయిలెట్ ట్యాక్స్.. ఆస్పత్రులపై కొత్త పన్ను భారం

పాకిస్తాన్‌లోని పంజాబ్ ప్రావిన్స్ ప్రభుత్వం ఆస్పత్రులపై టాయిలెట్ ట్యాక్స్ విధించింది. రాష్ట్రంలో నిధుల కొరత తీవ్రంగా ఉన్న నేపథ్యంలో ఈ వివాదాస్పద నిర్ణయం తీసుకున్నారు. పంజాబ్ వాటర్ అండ్ శానిటేషన్ ఏజెన్సీ రహీమ్ యార్ ఖాన్ నగరంలోని ఆస్పత్రులకు టాయిలెట్ ట్యాక్స్ నోటీసులు జారీ చేయడం ప్రారంభించింది. లాలా ఇక్బాల్ ఖాన్ హాస్పిటల్‌కు 15 టాయిలెట్లకు గాను 37,500 పాకిస్తానీ రూపాయలు, నసీర్ మెడికల్ కాంప్లెక్స్‌కు 17 టాయిలెట్లకు 62,500 రూపాయల చొప్పున నోటీసులు పంపారు. దీని ప్రకారం ప్రతి టాయిలెట్‌పై 2,500 నుంచి 3,700 రూపాయల వరకు పన్ను విధిస్తున్నట్లు తెలుస్తోంది. అయితే, ప్రభుత్వం దీనిని టాయిలెట్ ట్యాక్స్‌గా పిలవడానికి నిరాకరిస్తూ, అధికారికంగా 'మురుగునీటి సర్వీస్ ఫీజు'గా పేర్కొంటోంది. పంజాబ్ WASA డిప్యూటీ డైరెక్టర్ అహ్మద్ నవీద్ మాట్లాడుతూ, ఈ పన్నుకు పంజాబ్ క్యాబినెట్ ఆమోదం లభించిందని, వాణిజ్య ప్రాంతాల్లో మాత్రమే దీనిని వర్తింపజేస్తామని తెలిపారు. కానీ, ఆస్పత్రులు కూడా ఈ పన్ను నుంచి మినహాయింపు పొందలేదని నోటీసులు స్పష్టం చేస్తున్నాయి. ఫీజు నిర్మాణంపై స్పష్టత లేకపోవడంతో ప్రజలు గందరగోళానికి గురవుతున్నారు. ఈ చర్య వెనుక పాకిస్తాన్ ఎదుర్కొంటున్న తీవ్ర ఆర్థిక సంక్షోభం కారణమని విశ్లేషకులు భావిస్తున్నారు. హుర్ముజ్ జలసంధి పరిస్థితులు, ఇంధన ధరల పెరుగుదల నేపథ్యంలో పలు దేశాలు పన్నులు పెంచుతుండగా, పాకిస్తాన్ మాత్రం తొలుత టాయిలెట్లపై దృష్టి పెట్టడం గమనార్హం.