పాలమూరు ప్రాజెక్టుల పెండింగ్ పనులకు 4,694 ఎకరాల భూసేకరణ అవసరం

పాలమూరు జిల్లాలోని ప్రధాన సాగునీటి ప్రాజెక్టుల పెండింగ్ పనులకు మరో 4,694 ఎకరాల భూసేకరణ అవసరమని అధికారులు అంచనా వేస్తున్నారు. పాలమూరు-రంగారెడ్డి ఎత్తిపోతల పథకం, కల్వకుర్తి, నెట్టెంపాడు, రాజీవ్ భీమ, తుమ్మిళ్ల తదితర ప్రాజెక్టుల కాలువల నిర్మాణాలకు ఈ భూమి తప్పనిసరి అవుతోంది.

పాలమూరు-రంగారెడ్డి ప్రాజెక్టు పరిధిలో ఉద్దండాపూర్ జలాశయానికి నీరు రావడానికి 248 ఎకరాలు, కల్వకుర్తి పథకానికి 2,386 ఎకరాలు, మల్లమ్మకుంట రిజర్వాయర్‌కు 567.45 ఎకరాలు, నెట్టెంపాడుకు 534.71 ఎకరాలు, కోయిల్ సాగర్‌కు 347 ఎకరాలు, రాజీవ్ భీమ పథకాలకు 147 ఎకరాలు సేకరించాల్సి ఉంది. డిస్ట్రిబ్యూటరీ కాలువలు, లింక్ కెనాల్‌ల కోసం పాలమూరు-రంగారెడ్డి ప్రాజెక్టుకు దాదాపు 8,000 ఎకరాలు అవసరమని అంచనా.

ఇటీవల సీఎం రేవంత్ రెడ్డి పాలమూరు జిల్లాలో పర్యటించి భూసేకరణ ప్రక్రియ వేగవంతం చేయాలని అధికారులను ఆదేశించారు. ప్రభుత్వం ఉద్దండాపూర్ నిర్వాసితుల పునరావాసానికి రూ.600 కోట్లకు పైగా నిధులు విడుదల చేయడంతో పాటు వ్యవసాయ భూమి కనిష్ట ధరను ఎకరాకు రూ.2.75 లక్షలకు సవరించింది. అయితే బహిరంగ మార్కెట్‌లో భూముల ధరతో పోలిస్తే ప్రభుత్వం చెల్లించే పరిహారం చాలా తక్కువగా ఉందని నిర్వాసితులు అసంతృప్తి వ్యక్తం చేస్తున్నారు. భూసేకరణ పూర్తయితేనే ప్రాజెక్టు పనులు ముందుకు సాగే పరిస్థితి ఉంది.