రైతు సమస్యలపై ఎక్కడైనా చర్చ పెడితే వస్తా: సీఎం రేవంత్‌కు బీఆర్ఎస్ ఎమ్మెల్యే పల్లా రాజేశ్వర్ రెడ్డి సవాలు

బీఆర్ఎస్ ఎమ్మెల్యే పల్లా రాజేశ్వర్ రెడ్డి సోమవారం సీఎం రేవంత్ రెడ్డికి రైతు సమస్యలపై బహిరంగ చర్చకు సవాలు విసిరారు. రేవంత్ రెడ్డి స్థాయికి మాజీ ముఖ్యమంత్రి కేసీఆర్ అవసరం లేదని, తానొక్కడే చాలని ఆయన చెప్పారు. కేసీఆర్ నిధులను వరదలా పారిస్తే రేవంత్ రెడ్డి బూతులను వరదలా పారుస్తున్నారని ఎద్దేవా చేశారు.

రైతుబంధు, రుణమాఫీ, కాళేశ్వరం ప్రాజెక్టుపై సీఎం చేసిన వ్యాఖ్యలను పల్లా తప్పుబట్టారు. కాంగ్రెస్ ప్రభుత్వం 2.5 ఏళ్లలో రైతులకు రూ.36,000 కోట్లు ఇవ్వగా, బీఆర్ఎస్ హయాంలో 10 ఏళ్లలో రూ.72,000 కోట్లు అందించామని ఆయన పేర్కొన్నారు. సీఎం ప్రకటించినట్లు రైతుబంధు రూ.15 వేలకు పెంచలేదని, ప్రస్తుతం రూ.12 వేలు మాత్రమే ఇస్తున్నారని, దీంతో రూ.29 వేల కోట్లు బకాయి ఉందన్నారు.

రుణమాఫీ విషయంలో కాంగ్రెస్ రూ.50,000 కోట్లు మాఫీ చేస్తామని చెప్పి రూ.18,000 కోట్లు మాత్రమే చేసిందని పల్లా ఆరోపించారు. అప్పుల లెక్కల్లో సీఎం తప్పుడు సమాచారం ఇస్తున్నారని, 2014-2023 మధ్య బీఆర్ఎస్ ప్రభుత్వం చేసిన మొత్తం అప్పు రూ.3.90 లక్షల కోట్లేనని, ఇందులో రూ.72 వేల కోట్లు వారసత్వంగా వచ్చాయని వివరించారు. సీఎం రూ.7 లక్షల కోట్ల పైనే అప్పు ఉందని చెప్పడం తప్పన్నారు.

పంట సబ్సిడీ రూ.2,200 కోట్లు చెల్లించలేదని, 2.5 ఏళ్లలో పంట బీమా అమలు చేయలేదని, ఈ సీజన్లో కేవలం 7,600 మందికే బీమా లభించిందని పల్లా తెలిపారు. కాళేశ్వరం ప్రాజెక్టుపై సీఎం, ఉత్తమ్ కుమార్ రెడ్డికి అవగాహన లేదని విమర్శించారు.

రైతు సమస్యలపై ఎక్కడైనా చర్చ పెడితే తాను రైతుబంధు సమితి అధ్యక్షుడిగా హాజరవుతానని పల్లా ప్రకటించారు. అసెంబ్లీ, ప్రెస్ క్లబ్, జూబ్లీ హాల్, సచివాలయం ఏ వేదికైనా సిద్ధమన్నారు. బీఆర్ఎస్ నేతలు కేటీఆర్, హరీష్ రావు, తాను సమాధానం చెప్పడానికి సరిపోతారని, సీఎం వ్యాఖ్యల భాష సరికాదని ఆయన అన్నారు.