పల్లబురుసు ప్రీ-రిలీజ్ ఈవెంట్: ఆగస్టు 14న విడుదల, ఉదయ్ చౌహాన్ భావోద్వేగం

'పల్లబురుసు’ సినిమా ప్రీ-రిలీజ్ కార్యక్రమం నిర్వహించారు. ఈ సినిమా ఆగస్టు 14న థియేటర్లలో విడుదల కానుంది. అన్నపూర్ణ స్టూడియోస్, ఎపిక్ స్టూడియోస్ సంయుక్తంగా ఈ చిత్రాన్ని నిర్మించాయి. దర్శకుడు ఉదయ్ చౌహాన్ ఈ సందర్భంగా మాట్లాడారు.

ఉదయ్ చౌహాన్ మాట్లాడుతూ.. ‘పల్లబురుసు’ అంటే టూత్ బ్రష్ అని, మధ్యతరగతి కుటుంబాల్లో చిన్న చిన్న ఘటనల ఆధారంగా ఈ కథ రాసినట్లు తెలిపారు. మారుతున్న కాలంలో మానవత్వం కరువవుతోన్న సంఘటనలను చూసి ఈ కథ రాయాలనిపించిందని, గ్రేవ్‌యార్డ్‌లో ఒంటరిగా ఏడుస్తున్న వృద్ధుడి దృశ్యం తనపై బలమైన ప్రభావం చూపించిందని వివరించారు.

అన్నపూర్ణ స్టూడియోస్ అధినేత నాగార్జున పట్ల తనకు ఉన్న అభిమానం గురించి, ఆయన ఇచ్చిన ప్రోత్సాహం గురించి భావోద్వేగంగా గుర్తు చేసుకున్నారు. ‘నాకు అన్నపూర్ణ స్టూడియోస్ అమ్మలాంటిది’ అని చెప్పారు. ఈ చిత్రంలో సుధాకర్ రెడ్డి, మునిధర్ గౌడ, ప్రజ్వల్ గోమతీ తదితరులు నటించారు. ఛాయాగ్రహణం వినోద్, ఎడిటింగ్ సృజన, సంగీతం పవన్ సిహెచ్, సాహిత్యం సురేష్ నిర్వహించారు.